Madrid “Real”ı FİFA-ya La Liqada üzləşdiyi hakim səhvləri ilə bağlı sənəd təqdim edəcək. Bu məlumatı bir müddət əvvəl Madrid klubunun televiziyası yaymışdı. Sənəddə “Kral klubunun” ölkə çempionatının ilk 4 turunda və eləcə də ötən mövsümdəki oyunları zamanı hakimlərin buraxdıqları səhvlərlə bağlı məlumat yer alacaq. “As” qəzetinin yazdığına görə, rəhbərlik sənədi yekunlaşdırmaq üzrədir. Orada çoxsaylı hesabatlar, statistik məlumatlar və matçların videoyazıları yer alacaq.

“Real” rəhbərliyi Arda Gülərin “Malyorka” ilə oyunda sayılmayan qolunu, “Real Sosyedad”la görüşdə Din Heysenin aldığı qırmızı vərəqəni və düzgünlüyü şübhə doğuran ofsaydları xüsusi qeyd edəcək.

Videolarda həmçinin ötən mövsüm “Selta” ilə matçda “Barselona”nın keçmiş müdafiəçisi İnyiqo Martinsə qırmızı vərəqə göstərilməməsi yer alacaq. Halbuki bənzər epizoda görə Heysen meydandan qovulmuşdu. Bundan əlavə, FİFA-ya “Neqreyra işi” haqqında məlumat veriləcək. Məsələn, İspaniya hakimlər komitəsinin keçmiş vitse-prezidenti Xose Mariya Enrikes Neqreyranın “Barselona”ya referi Jesus Hil Mansanonun “qayğısına qalmağı” tövsiyə etməsi göstəriləcək. Bundan başqa Neqreyra və onun oğlu ilə əlaqəsi olan hakimlərin siyahısı təqdim olunacaq.