Dünya çempionatında oyun idarə etməyə hazırlaşan somalili hakim Ömər Artan ABŞ-a buraxılmasa da, ali futbol qurumları ona sahib çıxıb. BBC-nin məlumatına görə, turnirdən uzaqlaşdırılan 34 yaşlı referi çempionatdakı iştirakına görə FİFA-dan tam maaşını alacaq.

Dördilliyin ən mötəbər turnirinin startına az qalmış ABŞ Gömrük və Sərhəd Mühafizə Xidməti somalili hakimi ölkəyə buraxmayıb. Rəsmi Vaşinqton buna səbəb kimi Artanın “terror təşkilatları ilə əlaqəsi olan şübhəli şəxslərlə” bağlarının tapılmasını göstərib.

“New York Times” qəzetinə müsahibəsində referi hava limanında 11 saat dindirildiyini, polislərin ondan Somalidəki siyasi vəziyyət və “Əş-Şəbab” qruplaşması barədə soruşduqlarını bildirib. Saxlanılaraq İstanbula, oradan isə Mogadişuya göndərilən Artan böyük məyusluq yaşadığını gizlətməyib: “Mən sadəcə xəyalını gerçəkləşdirmək istəyən bir hakiməm. Bütün sənədlərim və vizam qaydasında idi, adım FİFA-nın rəsmi siyahısında yer alırdı”.

Vətənində qəhrəman kimi qarşılanan Ömər Artana FİFA tam maaşını ödəmək qərarına gəlib (məbləğ açıqlanmır). Bununla belə, ədalət təmsilçisinə ən böyük mənəvi təsəlli UEFA-dan gəlib. UEFA və Afrika Futbol Konfederasiyasının əməkdaşlığı çərçivəsində somalili hakim Avropa Superkuboku matçına baş hakim təyin olunub. O, Çempionlar Liqasının qalibi PSJ ilə Avropa Liqasını qazanan “Aston Villa” arasındakı mövsümün açılış oyununu idarə edəcək. Bu təyinat idman ictimaiyyətində hakimin dünya çempionatından kənar qalmasına görə bir növ kompensasiya kimi qiymətləndirilir.