Dünya çempionatının qrup mərhələsi davam edir. Bu axşam E və F qrupunda ilk turun oyunları keçiriləcək.
Almaniya: 2014-cü ildəki son dünya çempionluğundan sonra təxminən on ili boşa verən “Bundestim”, yalnız Yulian Naqelsmannın gəlişi ilə yenidən canlana bildi. Doğma Avro-2024-də İspaniyaya əlavə vaxtda uduzan almanlar, ötən il Millətlər Liqasının final mərhələsindəki uğursuzluqdan və seçmə mərhələsinə Slovakiyaya məğlubiyyətlə başlamasından sonra yenidən eniş yaşamışdılar. Lakin Naqelsmann vəziyyəti tezliklə düzəldə bildi. Komanda qrup turnirini lideri qismində bsşa vurdu və yoldaşlıq oyunlarında 100 faizlik nəticə göstərdi. Son olaraq ötən həftəsonu turnirin ev sahibi ABŞ-ni 2:1 hesabı ilə üstələməyi bacardılar.
Kürasao: Niderlanda məxsus, cəmi 150 min əhalisi olan bu kiçik ada dövləti təcrübəli Dik Advokatın rəhbərliyi altında futbol tarixi yazır. Təcrübəli mütəxəssis “adalılar”ı Yamaykanı qabaqlayaraq qrup lideri etməyi bacardı. Ailə problemlərinə görə qısamüddətli gedişindən sonra yayda yenidən posta qayıdan Advokatın gəlişi ilə millinin yoldaşlıq oyunları o qədər də uğurlu alınmadı (Şotlandiyaya 1:4 məğlubiyyət). Lakin mundial öncəsi son sınaqda Aruba 4:0 hesabı ilə darmadağın edildi.
Avropa nəhəngi Karib hövzəsinin bu təvazökar təmsilçisi ilə tarixdə ilk dəfə qarşılaşacaq.
E qrupu, I tur
14 iyun
Almaniya – Kürasao
Saat: 21:00
Stadion: Houston Stadium (Hyuston, ABŞ)
Baş hakim: Calal Cayed (Mərakeş)
Canlı yayım: İctimai TV, TRT 1, Matç! TV, Matç! Futbol 1
Niderland: Qətərdəki son dünya çempionatında Lui van Qalın başçılığı ilə yenidən özündən söz etdirən “narıncılar”, Ronald Kumanın gəlişi ilə daha sabit və inamlı təsir bağışlayırlar. Avropadakı yarımfinal və Millətlər Liqasındakı uğurlu çıxışdan sonra komanda mundialın seçmə mərhələsini də qrup lideri kimi tamamladı. Niderlandlılar 2026-cı ilə Norveç üzərində 2:1 hesablı qələbə ilə başlasalar da, ardınca Ekvadorla heç-heçə (1:1) və Əlcəzairə gözlənilmez məğlubiyyət (0:1) gəldi. Turnir öncəsi son hazırlıq matçında isə Özbəkistanı yalnız son saniyələrdə vurulan penalti qolu ilə çətinliklə (2:1) məğlub edə bildilər.
Yaponiya: Ötən əsrin sonundan bəri heç bir dünya çempionatını qaçırmayan “Samuraylar” bu turnirə də vəsiqəni ilk təmin edənlərdən oldular (seçmə mərhələdə 10 oyuna 23 xal). Hacime Moriyasunun yetirmələri yoldaşlıq oyunlarında inanılmaz seriya yaxalayıblar. Yaponiya millisi 2026-cı ildə Şotlandiya, İngiltərə və İslandiyanı eyni – 1:0 hesabı ilə məğlub edib. Qeyd edək ki, komanda mayın sonundan bəri yoldaşlıq oyunu keçirməyib və birbaşa məşqlərə fokuslanıb.
İndiyə qədər komandalar arasında keçirilən 3 matçın 2-də (o cümlədən DÇ-2010-da) Niderland qalib gəlib, son qarşılaşmada isə bərabərlik qeydə alınıb.
F qrupu, I tur
15 iyun
Niderland – Yaponiya
Saat: 00:00
Stadion: AT&T Stadium (Arlinqton, ABŞ)
Baş hakim: İsmayıl Elfath (ABŞ)
Canlı yayım: İctimai TV, TRT 1, Matç! TV, Matç! Futbol 1