Premyer Liqanın 29-cu turunun mərkəzi qarşılaşmasında “Neftçi”ni 5:1 hesabı ilə məğlub edən “Qarabağ”ın baş məşqçisi Qurban Qurbanov matçdan sonra jurnalistlərin suallarını cavablandırıb. Təcrübəli mütəxəssis komandasının oyunundan razı qalsa da, qarşıdakı sınaqlar öncəsi futbolçularına xəbərdarlıq edib.

Qurban Qurbanov sözlərinə futbolçularını və azarkeşləri təbrik edərək başlayıb: “Futbolçularımı təbrik edirəm, bu gün meydanda həqiqətən yaxşı oyun nümayiş etdirdilər və bizim üçün vacib olan üç xalı aktivimizə yazdıq. Stadiondakı ab-havaya görə hər iki komandanın azarkeşlərinə xüsusi təşəkkürümü bildirirəm”.

Mütəxəssis start heyətində etdiyi bəzi dəyişikliklərə də aydınlıq gətirib. O, sıx təqvimin komandaya təsir etdiyini gizlətməyib: “Start heyətini müəyyənləşdirərkən futbolçuların fiziki hazırlığını əsas götürdük. Çox gərgin qrafikdə oynayırıq və bəzi uşaqlarda ciddi yorğunluq var idi. Buna görə də rotasiyalara əl atdıq. Şadam ki, şans verdiyimiz futbolçular məşqlərdəki əziyyətlərini yerə vurmadılar və özlərini ən yaxşı tərəfdən göstərdilər”.

Derbi öncəsi hazırlıq prosesindən danışan Qurbanov, rəqibin adının futbolçular üçün kifayət olduğunu bildirib: “Hazırlaşmaq üçün cəmi bir günümüz və bircə komanda məşqimiz var idi. Lakin “Neftçi”yə qarşı oynayanda futbolçulara əlavə motivasiya verməyə ehtiyac qalmır. Belə böyük oyunlarda həm futbolçular mübarizə aparmaqdan, həm də azarkeşlər izləməkdən zövq alırlar”.

Qələbənin sevincini çox uzatmayan baş məşqçi, diqqəti növbəti matça yönəldib. O, 5:1-lik hesabın komandada arxayınlıq yarada biləcəyindən ehtiyatlanır: “Bizim üçün növbəti qarşılaşma daha böyük əhəmiyyət kəsb edir. Komandanı həmin oyuna psixoloji cəhətdən düzgün hazırlamalıyıq. Böyükhesablı qələbələr bəzən futbolçularda yersiz arxayınlıq yaradır. Bu səbəbdən növbəti oyunun hazırlıq prosesi bizim üçün daha çətin və məsuliyyətli keçəcək”.