Sonuncu dəfə yanvarın 30-da məhz “Karvan” üzərində səfər qələbəsindən sonra “Sumqayıt” gözlənilmədən qara zolağa düşdü. Son 4 oyunda yalnız bir qolsuz heç-heçə etməklə qalan 3 oyunda uduzan Gənclik şəhərinin təmsilçiləri mükafat yerləri uğrunda mübarizə imkanlarını xeyli büdrətdi. Turnir cədvəlinin sonuncu pilləsindən asılı qalan yevlaxlılar rəqibin düşdüyü durumu yaxşı anlayırdı və bu səbəbdən bu oyunda kifayət qədər cəsarətli oldular. Xüsusən də ilk yarıda meydan sahibləri azı iki-üç dəfə rəqib qapısı önündə gərginlik yarada bildi. Lakin ustalıq səviyyəsinin aşağı olması özünü göstərdi. Demək olar bərabər keçən ilk yarı qolsuz başa çatdı.
İkinci hissənin əvvəlində vəziyyət dəyişdi. Qonaqların kapitanı Abdullazadə penalti ilə hesabı açdı. Bundan sonra yevlaxlılar fəallıq göstərərək məğlubiyyətdən qaçmağa çalışsa da, sumqayıtlılar diqqətli oynayaraq qələbəyə xeyli yaxınlaşmışdılar. 71-ci dəqiqədə “Sumqayıt” fərqi artırmaq üçün növbəti şans qazandı. Lakin bu dəfə “Karvan-Yevlax”ın qolkiperi Pedru Mateuş, Rüstəm Əhmədzadənin penalti zərbəsini dəf edərək komandasını oyunda saxladı.
Oyunun son dəqiqələri Yevlax təmsilçisinin gərgin təzyiqi ilə yadda qaldı. “Kimyaçılar” qələbə hesabını qorumağa çalışsa da, 90+4-cü dəqiqədə Coy-Sleyd Mikkels bərabərlik qolunu vuraraq qonaqların qələbə ümidlərini puç edib.
Bu heç-heçə ilə “Sumqayıt” faktiki olaraq Avrokuboklara vəsiqə qazanmaq şansını minimuma endirdi. Füzuli Məmmədovun rəhbərlik etdiyi “Karvan-Yevlax” isə 21 oyunluq qələbəsizlik seriyasına son qoya bilməsə də, son saniyələrdə 1 xal qazanmağı bacarıb.
KARVAN-YEVLAX – SUMQAYIT 1:1 (0:0)
Qollar: S. Abdullazadə, 51-pen. (0:1); Mikkels, 90+4 (1:1)
Baş hakim: Əli Əliyev.
Karvan-Yevlax: Pedru Mateuş, Vadim Abdullayev, Rauf Rüstəmli (Uğur Cahangirov, 76), Elvin Yunuszadə (k), Emin Rüstəmov (Piter Kinqs, 69), Coy-Sleyd Mikkels, Şakil Sno, Kayl Spens (Samir Abdullayev, 75), Moyze Ngvisani, Qavi Tompson, İmani Barker.
Sumqayıt: Xəyal Fərzullayev, Rüstəm Əhmədzadə, Aleksa Yankoviç (Emil Mustafayev, 66), Səbuhi Abdullazadə (k), Nadir Orucov, Rayan Senhaci, Sedrik Badolo (Simon Nsane, 66), Nihat Əhmədzadə (Sənan Muradlı, 81), Danilo Beskorovaynı, Masaki Murata, Keffel.
Sarı vərəqələr: Beskorovaynı, 33. Murata, 71.
Qaçırılan penalti: Əhmədzadə, 73 (qapıçı).