Misli Premyer Liqanın 30-cu turunda “Sumqayıt”a 2:1 hesabı ilə qalib gələn “Kəpəz”in baş məşqçisi Azər Bağırov oyundan sonra mətbuat konfransında iştirak edib.

Görüşü dəyərləndirən mütəxəssis, komandasının əzmkar oyun nümayiş etdirdiyini bildirib: “Maraqlı oyun alındı. Əslində, matça yaxşı başlaya bilərdik, lakin əldə etdiyimiz imkanlardan istifadə edə bilmədik. Üstəlik, qapımızda gözlənilməz, bir qədər kuryoz qol gördük. Buna baxmayaraq, futbolçularım xarakter nümayiş etdirərək əzmkar qələbə qazandılar. Bu qələbəyə görə komandama minnətdaram”.

Matçdan əvvəl mümkün məğlubiyyət halında istefaya göndəriləcəyi ilə bağlı yayılan iddialara toxunan Bağırov, bu növ şayiələrə əhəmiyyət vermədiyini vurğulayıb: “İstefa ilə bağlı deyilənlərdən xəbərim yoxdur, bu barədə heç nə eşitməmişəm. “Kəpəz”in həqiqi azarkeşləri mən bu postu təhvil alanda komandanın hansı acınacaqlı vəziyyətdə olduğunu yaxşı bilirlər. Gəldiyim vaxt xalımız yox idi, legioner transferi limitimiz isə demək olar ki, dolmuşdu”.

Heyətlə bağlı çətinliklərdən bəhs edən baş məşqçi, qış transfer pəncərəsindəki məhdudiyyətləri xatırladıb: “Qış fasiləsində aşağı liqalardan 6 oyunçu və cəmi bir legioner cəlb edə bildik. Bu gün bizim geniş ehtiyat oyunçular skamyamız yoxdur. Real vəziyyəti görən tərəfdarlarımız bizi hər zaman dəstəkləyirlər. Bəzi qüvvələr isə hətta qələbə qazandığımız vaxtlarda belə tənqid etməyə bəhanə axtarırlar”.