Polşanın nüfuzlu “Przeglad Sportowy” portalı ölkə çempionatında liderlik uğrunda mübarizə aparan “Lex”in Çempionlar Liqasındakı perspektivlərini təhlil edib. Məqalədə Azərbaycan Premyer Liqasındakı mövcud vəziyyətin Polşa təmsilçisinin püşkatma taleyinə birbaşa təsir edə biləcəyi vurğulanır.
Ekspertlərin fikrincə, əgər “Lex” mövsümü çempion kimi tamamlasa, son on ilin ən əlverişli püşkatma imkanı ilə üzləşəcək. UEFA reytinqi üzrə mütəxəssislər qeyd edirlər ki, Polşa klubu ÇL-in həm ikinci, həm də üçüncü təsnifat mərhələlərində “səpələnmişlər” sırasında yer almaq şansı qazanıb. Bu isə kağız üzərində daha zəif rəqiblərlə qarşılaşmaq deməkdir.
Məqalədə bu əlverişli vəziyyətin əsas səbəbi kimi Avropanın digər liqalarındakı sürpriz nəticələr göstərilir. Xüsusilə, Azərbaycan çempionatındakı vəziyyət polşalıların diqqət mərkəzindədir: ”Azərbaycanın “Sabah” klubu çempionluğa doğru inamla irəliləyir. 25 turdan sonra onlar “Qarabağ”ı 10 xal qabaqlayırlar. Hamımız xatırlayırıq ki, Azərbaycanın daimi çempionu (“Qarabağ”) Polşa klubları üçün illərdir nə qədər böyük problemlər yaradıb.Polşalı analitiklər bildirirlər ki, “Lex”in daha rahat püşk alması üçün Avropanın bir neçə ölkəsindəki “reytinq nəhəngləri”nin taxtdan salınması şərtdir. Hazırda bu prosesin ən bariz nümunəsi kimi Azərbaycan göstərilir. Oxşar ssenarilərin Slovakiya, Macarıstan, Ukrayna və Danimarka liqalarında da təkrarlanması “Lex”in işini asanlaşdıran amillər sırasındadır.
Qısası, Polşa təmsilçisi “Sabah”ın çempionluğunu öz uğurlarının dolayı açarı kimi görür və illərdir Polşa klublarının kabusuna çevrilən “Qarabağ” amilinin sıradan çıxmasını maraqla gözləyir.