İngiltərə millisi ABŞ-da gözlənilməz soyğun hadisəsi ilə üzləşib. Şənbə gecəsi Kanzas-Sitidə komandanın mikroavtobusundan ümumi dəyəri təxminən 18 000 dollar olan əşyalar oğurlanıb.
BBC-nin yaydığı rəsmi siyahıya əsasən, qarət olunan əşyaların sırasına dörd cüt futbol butsusu, üç imzalı forma və bir futbol topu ilə yanaşı, iki ədəd yumşaq oyuncaq və “Nike” idman ayaqqabısı formasındakı xüsusi “Lego” dəsti də daxil olub.
Kanzas-Siti polisinin çevik müdaxiləsi sayəsində oğurlanmış əşyaların böyük hissəsi qısa zamanda tapılaraq komandaya qaytarılıb. Hadisə ilə bağlı iki şübhəli şəxsə qarşı ittiham irəli sürülüb və onları 7 ilədək həbs cəzası gözləyir. Cekson dairəsinin prokuroru Melesa Conson operativ araşdırmaya və çevik ittiham aktına görə hüquq-mühafizə orqanlarına təşəkkürünü bildirib.
Bu xoşagəlməz hadisə millinin ümumi ab-havasına və hazırlıq prosesinə mənfi təsir göstərməyib. Komandanın müdafiəçisi Den Bern BBC-yə müsahibəsində hadisəni belə şərh edib: “Bu barədə demək olar ki, heç danışmırıq. Bu da məsələnin bizi çox da narahat etmədiyini göstərir. Hadisə hazırlıq planlarımıza heç bir maneə törətmədi”.