Reyslərin gecikdirilməsi, xaotik şam yeməkləri və soyunub-geyinmə otağında dözülməz istilik… “Arsenal”ın baş məşqçisi Mikel Arteta mövsümə hazırlıq mərhələsində futbolçularına qarşı bilərəkdən belə süni maneələr yaratdığını etiraf edib.

“Bu üsul mənim çox xoşuma gəlir”, – deyə 44 yaşlı ispaniyalı mütəxəssis bildirib.

Bu həftə Çempionlar Liqası matçı üçün Neapola yola düşən “topçular”ın təyyarə reysi yenə təxirə düşüb. Lakin görünür, “Arsenal” heyəti artıq bu cür gözlənilməz ssenarilərə tam hazırdır. Arteta cümə günü keçirilən mətbuat konfransında təlim-məşq toplanışı zamanı atdığı qəribə addımların pərdəarxasını açıqlayıb: “Mövsümə hazırlıq dövründə bu cür şəraitləri qəsdən yaratmışdım. Ona görə də analoji hallar baş verəndə komanda artıq hazır olur. Reysi və ya qatarı qaçıranda adətən hər kəs təşvişə düşür. Amma belə böhran anlarını idarə etməyi bacarmaq lazımdır”.

Jurnalistlərin konkret olaraq hansı addımları atdığı ilə bağlı sualına isə Arteta belə cavab verib: “Soyunub-geyinmə otaqlarında temperaturu həddindən artıq qaldırdıq, yemək saatlarını gecikdirdik, hətta masaj masalarının sayını azaltdıq. Bir sözlə, komandanı sınağa çəkmək üçün çox şey etdik.”

Qeyd edək ki, London təmsilçisi Premyer Liqa çərçivəsində növbəti matçını bu günü “Sanderlend”ə qarşı keçirəcək.