“Real”ın yarımmüdafiəçisi Arda Gülər klubla yeni müqavilə imzalamağa çox yaxındır. 21 yaşlı futbolçunun hazırkı sözləşməsi 2029-cu ilin yayına qədər qüvvədə olsa da, danışıqların gedişatından xəbərdar mənbələr tərəflərin əməkdaşlığı 2032-ci ilin yayına qədər uzatmaq barədə prinsipial razılığa gəldiyini bildiriblər.

Gülər 2023-cü ilin yayında “Fənərbaxça”dan Madrid klubuna transfer olunub. Ötən müddətdə əsas heyətdə özünə yer qazanan türkiyəli futbolçu çərşənbə axşamı “İnter” üzərində 2:1 hesablı qələbədən əvvəl UEFA tərəfindən Çempionlar Liqasının 2025/26 mövsümünün “Ən yaxşı gənc oyunçusu” mükafatına layiq görülüb.

O, indiyədək “Real”ın heyətində 119 matç keçirib və bu müddətdə 5 titul qazanıb. Onların arasında 2024-cü ildə əldə olunan Çempionlar Liqası və La Liqa çempionluğu da var. Gülər cari mövsümdə komandasının çempionatdakı 4 matçının 3-də start heyətində meydana çıxıb.

Türkiyə millisinin də əsas oyunçularından olan yarımmüdafiəçi yığmada 33 oyunda 7 qol vurub. Son dünya çempionatında Türkiyənin keçirdiyi 3 matçın hər birində 90 dəqiqə meydanda qalan Gülər 1 qola imza atsa da, komanda turniri qrup mərhələsində başa vurub.

Yeni müqavilə “Real” rəhbərliyinin Gülərə olan etimadını və onun klubun gələcək planlarındakı yerini göstərir. Madrid təmsilçisində dördüncü mövsümünü keçirən futbolçunun rolu getdikcə artır. O, ötən mövsüm 51 oyunda 6 qol və 14 məhsuldar ötürmə ilə yadda qalıb.

Baş məşqçi Joze Mourinyo da Gülərin potensialını yüksək qiymətləndirir. Portuqaliyalı mütəxəssis yaxın günlərdə bildirib ki, türkiyəli futbolçu gələcəkdə hücum xəttindən əlavə, pley-meyker mövqeyində də komandanın oyununu təşkil edə bilər: “Bəlkə bu gün yox, amma zamanla Gülər komandanın əsl oyun təşkilatçısına çevrilə bilər”.

Yay transfer dönəmində “Real”ın yarımmüdafiə xəttinə böyük məbləğ xərcləməməsinin əsas səbəblərindən biri də klub rəhbərliyinin Cud Bellingem və Arda Gülərə olan inamı idi. Madrid təmsilçisi hər iki futbolçunun komandanın gələcək quruluşunda əsas fiqurlardan olacağına əmindir.