“Sabah”ın U-19 komandası UEFA Gənclər Liqasının əsas mərhələsinə məğlubiyyətlə başlayıb.

Azərbaycan təmsilçisi ilk turda İngiltərənin “Mançester Yunayted” klubunun U-19 komandası ilə qarşılaşıb. Görüş “qırmızı şeytanlar”ın 5:0 hesablı qələbəsi ilə başa çatıb.

“Mançester Yunayted”in 15 yaşlı futbolçusu Cey Cey Qabriel UEFA Gənclər Liqasındakı debütünü het-triklə qeyd edib. Gələcəyin ulduzlarından biri hesab olunan gənc hücumçu ötən ay “Atletiko” ilə yoxlama oyununda sonradan meydana çıxaraq əsas komandada da debüt edib.

Hələlik Maykl Kerrikin rəhbərlik etdiyi komandanın rəsmi oyunları üçün iştirak ərizəsinə daxil edilməyən və gələn ay 16 yaşı tamam olacaq Qabriel bununla belə, əsas komandaya yüksəlmək üçün iddialarını davam etdirir.

“Mançester Yunayted” U-19 – “Sabah” U-19 5:0 (3:0)

Qollar: A. İbrahimov, 2 (1:0), Uotson, 16 (2:0), Qabriel, 45 (3:0), 85 (4:0), 87 (5:0).

“Sabah” U-19 növbəti matçını oktyabrın 13-də keçirəcək. Azərbaycan təmsilçisi həmin gün Çexiyanın “Slaviya” komandası ilə qarşılaşacaq. Daha sonra “Sabah” “Borussiya” (Almaniya, 20 oktyabr), “Vikinq” (Norveç, 4 noyabr), “Barselona” (İspaniya, 25 noyabr) və “Vilyarreal” (İspaniya, 8 dekabr) ilə üz-üzə gələcək.