Avropada qitə çempionatının heyəcanı yaşandığı bir vaxtda, Yaponiyada keçirilən Asiya çempionatında voleybol dünyasının diqqətini çəkən yeni bir ulduz parlayır.

Qətər milli komandasının şərəfini qoruyan 13 yaşlı Mubarak Musa turnirdə keçirdiyi cəmi 3 oyunda 40 xal toplayaraq diqqət mərkəzinə düşüb. “A Bola” nəşrinin məlumatına görə, 210 santimetr boya olan yeniyetmə istedad turnirin ən böyük kəşflərindən biri hesab olunur.

Musanın əsl sıçrayışı isə Asiya çempionatından öncə təşkil olunan Çağırış Kubokuna (Challenge Cup) təsadüf edib. O, Cənubi Koreyaya qarşı matçda endirdiyi 16 zərbənin 11-ini xala çevirərək fantastik effektivlik nümayiş etdirib. Qətərin turniri 7-ci pillədə başa vurmasında müstəsna rol oynayan hücumçu, ardınca Tayvanla görüşdə də aktivinə 13 xal yazdırıb.

Mubarak Asiya çempionatındakı uğurlu seriyasını davam etdirib: Taylandla matçda 12, Tayvanla oyunda 11, Koreya ilə qarşılaşmada isə 17 xal toplayaraq komandasının əsas silahına çevrilib.

Gənc voleybolçu təkcə salonda deyil, qum üzərində də iddialıdır. Mayda U-18 yığmaları arasında keçirilən çimərlik voleybolu üzrə Asiya çempionatında komanda yoldaşı Musa Alkeer ilə birlikdə bürünc medal qazanıb. O, bu uğura özündən yaşca böyük rəqiblərlə mübarizədə nail olub.

“L’Equipe” nəşrinin yazdığına görə, Musa 2012-ci ilin noyabrın 24-də Cənubi Sudanda anadan olub. O, 2013–2020-ci illərdə vətənində tüğyan edən vətəndaş müharibəsindən qaçaraq Qətərə pənah gətirib. Dəqiq nə vaxt köçdüyü bilinməsə də, artıq cari ilin əvvəlində Qətərin əsas millisində debüt edib.