Kamerun Futbol Federasiyasının prezidenti, sabiq ulduz hücumçu Samuel Eto’o növbəti dəfə maliyyə pozuntuları və korrupsiya iddiaları ilə gündəmə gəlib. “The Sun” nəşrinin məlumatına görə, FIFA prezidenti Gianni Infantino 45 yaşlı Eto’o-nu rəsmi araşdırmadan qorumaqda şübhəli bilinir.
İddiaların mərkəzində 2023-cü ildə Rusiya və Kamerun milli komandaları arasında keçirilən yoldaşlıq oyunu dayanır. Rusiyanın Ukraynaya hərbi müdaxiləsindən sonra tətbiq edilən beynəlxalq boykotlara qoşulmayan ölkələrdən biri olan Kamerun həmin matçın təşkili müqabilində Rusiyadan təxminən 578 min avro (670 min dollar) məbləğində vəsait alıb.
Lakin federasiyanın keçmiş idarə heyəti üzvlərinin iddiasına görə, həmin məbləğ Kamerun Futbol Federasiyasının rəsmi hesablarına köçürülməyib. Onların sözlərinə görə, pul birbaşa Eto’o-nun Qətərdəki şəxsi bank hesabına transfer edilib. Vəsaitin sonrakı taleyi isə məlum deyil.
Məsələ ilə bağlı hazırlanan rəsmi dosye ötən il FIFA-nın Sürixdəki qərargahına təqdim edilsə də, qurum hələlik susqunluğunu qoruyur. Mənbələrin iddiasına görə, Infantino araşdırma qrupunun tərkibini üç nəfərə qədər azaldaraq prosesi şəxsən dayandırıb.
İddiaya əsasən, bunun səbəblərindən biri Eto’o-nun son dövrlərdə tənqidlərə məruz qalan FIFA rəhbərinə açıq dəstək verən azsaylı futbol funksionerlərindən biri olmasıdır.
FIFA isə bu iddiaları rədd edib. Qurumun rəsmi nümayəndəsi bildirib: “FIFA prezidentinin müstəqil hüquqi orqanlara heç bir təsir imkanı yoxdur. Biz hüquqi prosedurlara hörmətlə yanaşırıq. Lakin bu prosedurlar prezidentə qarşı əsassız ittihamlar irəli sürmək üçün vasitəyə çevrilməməlidir”.
Eto’o və Kamerun Futbol Federasiyası isə hələlik məsələ ilə bağlı açıqlama verməyib.
Bu, “Barselona”, “İnter” və “Çelsi” kimi nəhəng klublarda çıxış etmiş, Çempionlar Liqasının 4 qat qalibi olan əfsanəvi hücumçunun adının ilk dəfə qalmaqalda hallanması deyil.
Vergi pozuntusu (2022): Eto’o İspaniyada vergi ödənişlərindən yayınmaqda təqsirli bilinərək 22 aylıq şərti həbs cəzasına və təxminən 1,6 milyon avro (1,86 milyon dollar)məbləğində cəriməyə məhkum edilib.
Danışılmış oyun iddiaları (2024): O, oyunların nəticələrinin manipulyasiyasında ittiham olunub. Lakin sübutların yetərli olmadığı qənaətinə gəlinərək işə xitam verilib.
Qanunsuz bukmeker əməkdaşlığı: Rusiya mərc şirkətinin rəsmi səfiri olduğu üçün FIFA tərəfindən cəzalandırılan Eto’o daha sonra apellyasiya şikayəti verib və cəzası ləğv edilib.
Samuel Eto’o 2011–2013-cü illərdə Rusiyanın “Anji” klubunun da formasını geyinib.