Ölkə kubokunun həlledici qarşılaşmasına olan maraq pik həddə çatıb. Peşəkar Futbol Liqasının (PFL) son məlumatına görə, bakılıların prinsipial rəqabətinə səhnə olacaq final matçı üçün artıq 6000-ə yaxın bilet sahibini tapıb.

“Palms Sports Arena”nın ümumi 8031 nəfərlik azarkeş tutumu olduğunu nəzərə alsaq, tribunalarda boş yerlərin sürətlə tükəndiyini söyləmək olar. Reqlamentə əsasən hər iki finalçı kluba ilkin olaraq 1500 bilet ayrılıb. Klubların tələbata uyğun olaraq əlavə bilet almaq imkanı saxlanılır.

Təşkilatçılar final həyəcanını zirvəyə daşımaq üçün genişmiqyaslı hazırlıqlar görürlər. Oyun günü azarkeşlər üçün xüsusi fan-zonalar fəaliyyət göstərəcək, stadionun ərazisində final atmosferini canlandıracaq müxtəlif əyləncəli tədbirlər keçiriləcək.

Xatırladaq ki, “Sabah” – “Zirə” qarşılaşması mayın 13-də keçiriləcək. Görüşün start fiti saat 20:00-da səslənəcək.