Beynəlxalq Cüdo Federasiyası (IJF) Tacikistanın paytaxtı Düşənbədə keçirilən “Böyük Dəbilqə” turnirindən sonra yenilənmiş dünya reytinq cədvəlini açıqlayıb. Turnirin nəticələri Azərbaycan millisinin üzvlərinin mövqelərinə ciddi təsir göstərib.
Cüdoçularmız arasında liderliyini davam etdirən Olimpiya çempionu Zelim Kotsoyev (100 kq), aktivindəki 5120 xalla dünya reytinqindəki 2-ci mövqeyini qoruyub. Digər Olimpiya çempionumuz Hidayət Heydərov (73 kq, 4046 xal) və Ruslan Paşayev (66 kq, 3593 xal) də elit beşlikdəki yerlərini sabit saxlayıblar.
Cədvəldə ən kəskin dəyişiklik Balabəy Ağayevin (60 kq) reytinqində yaşanıb. Ötən siyahıda liderlər sırasında olan idmançımız 3 pillə geriləyərək 3658 xalla 4-cü yerə düşüb.
Düşənbədə bürünc medala sahib çıxaraq aktivlərini önəmli xallar yazdıran cüdoçularımız reytinqdə ciddi irəliləyişə nail olublar. Belə ki, ağır çəkidə Uşanqi Kokauri (+100 kq, 3682 xal) 5-ci pilləyə yüksəlib. Rəşid Məmmədəliyev (73 kq, 2547 xal) 11-ci, Camal Qamzatxanov (+100 kq, 2712 xal) isə 13-cü sırada qərarlaşmaqla mühüm sıçrayış ediblər.