Azərbaycan Basketbol Liqasında (ABL) yarımfinal həyəcanı yekunlaşıb. Günün maraqla gözlənilən qarşılaşmasında “Neftçi” və “Abşeron Lions” komandaları üz-üzə gəlib. Bakı İdman Sarayında baş tutan ikinci görüş “şirlər”in qələbəsi və finala vəsiqə qazanması ilə nəticələnib.
Seriyanın ilk oyununda rəqibini 95:89 hesabı ilə üstələyən “Abşeron Lions”, cavab qarşılaşmasında da üstünlüyünü qoruyub. Gərgin keçən mübarizənin yekununda tablo 90:81 hesablı qələbəni göstərib.
Qalib komandanın heyətində De’Ondre Cekson 27 xalla oyunun ən məhsuldar basketbolçusu olub.
Finala vəsiqə qazanmasına baxmayaraq, “Abşeron Lions” ciddi itki ilə üzləşə bilər. Komandanın amerikalı legioneri Ceyms Freyzerin “Sabah”a qarşı keçiriləcək final seriyasını qaçırmaq ehtimalı var.
Klubdan verilən məlumata görə, basketbolçunun sağ əlində şiş və sağ ayağında kəskin ağrılar mövcuddur. Freyzer özü finalda oynamaq istəsə də, onun parketə çıxıb-çıxmayacağına tibbi müayinədən sonra həkimlər qərar verəcək.
“Neftçi” – “Abşeron Lions” — 81:90 (26:30, 22:18, 16:21, 17:21)
Çempionluq uğrunda mübarizə aprelin son günlərində start götürəcək. Bütün qarşılaşmalar Bakı İdman Sarayında keçiriləcək.
Oyun Tarix Saat Qarşılaşma
I oyun 29 aprel 19:00 “Sabah” – “Abşeron Lions”
II oyun 2 may 14:00 “Abşeron Lions” – “Sabah”
III oyun 5 may 19:00 “Sabah” – “Abşeron Lions”