Mundialın startı ilə futbol arenasında çox şey dəyişib və bu dəyişikliklər FİFA-nın sabiq prezidenti Zep Blatterin ciddi narazılığına səbəb olub. 90 yaşlı keçmiş funksioner qurumun hazırkı siyasətini “X” platformasında kəskin tənqid atəşinə tutub.

1998-2015-ci illərdə FİFA-ya rəhbərlik etdiyi dövrdə adı tez-tez qalmaqallarda hallanan Blatter artıq böyük futboldan uzaq olsa da, turnirin gedişatını yaxından izləyir. Lakin hazırkı mənzərə onu heç də məmnun etmir.

Xüsusilə, hava şəraitindən asılı olmayaraq, oyunçuların su içməsi üçün matçların hissənin tən ortasında dayandırılması (su fasilələri) bir çox dairələrdə narazılıq doğurmuşdu. Blatter bu barədə belə yazıb: “Su fasilələri hələ başlanğıc idi…”.

Dünya çempionatının final oyununun fasiləsində genişmiqyaslı şou proqramının təşkili planı idman ictimaiyyətində mənfi reaksiya doğurub. Blatter bu addımı Amerikan futbolundakı məşhur turnirə istinad edərək “Superboulun surəti” adlandırıb: “Bazar günü keçiriləcək Dünya Kubokunun finalı futbol tarixinin ən uzun fasiləsi ilə yadda qalacaq. FİFA, sən hara yuvarlanırsan?”

Xatırladaq ki, Zep Blatter 2015-ci ildə korrupsiya və rüşvət qalmaqalları fonunda vəzifəsindən istefa vermiş, İsveçrə rəsmiləri tərəfindən fırıldaqçılıqda ittiham olunsa da, 2022-ci ildə məhkəmə tərəfindən bəraət almışdı. Hazırda FİFA-ya onun xələfi Canni İnfantino rəhbərlik edir.