İspaniya millisinin baş məşqçisi Luis de la Fuente DÇ-2026-nın Argentina ilə həlledici final matçı öncəsi mətbuat konfransı keçirib. “AS” nəşrinə istinadən xəbər veririk ki, “Qırmızı furiya”nın çalışdırıcısı qarşıdakı tarixi duel, gənc ulduz Lamin Yamalın səhhəti və rəqibin lideri Lionel Messi barədə maraqlı fikirlər səsləndirib.

Final matçının gərginliyinə baxmayaraq, təmkinli görünən ispan mütəxəssis bunları deyib: “Bizi möhtəşəm bir tamaşa gözləyir. Hər iki komandanın oxşar cəhətləri çoxdur və hər kəs oyunu öz xeyrinə dəyişməyə çalışacaq. Biz ustalıq və istedadın həlledici rol oynayacağı bir matça köklənmişik. Sözün düzü, hazırda məni ancaq geri qayıdacağımız vertolyot səfəri həyəcanlandırır, başqa heç nə. Tamamilə arxayınam. Belə bir vəziyyətdə olmaq böyük xoşbəxtlikdir və biz sadəcə bu anın dadını çıxarmaq istəyirik. Hakimlərə gəldikdə isə, biz onlara kömək etməli, onlar da öz növbəsində oyunun baxımlı olmasına diqqət yetirməlidirlər”.

De la Fuente Lamin Yamalın zədə ehtimallarına da aydınlıq gətirib: “Lamin hər zamankı kimi öz oyununu oynamalıdır. O, penalti epizodunda sərt zərbə almışdı və yüngül ağrıları var idi. Bu səbəbdən məşq etməsini məqsədəuyğun saydıq. Hazırda heç bir problemi yoxdur və fiziki forması əladır”. Baş məşqçi çıxışının sonunda Argentina millisinin kapitanı Lionel Messi ilə bağlı illər öncəyəki təbəssüm doğuran bir xatirəsini də jurnalistlərlə bölüşüb: “Sizə maraqlı bir hadisə danışım. Vaxtilə ‘Sevilya’nın gənclər komandasını çalışdırarkən “Barselona”ya qarşı oynayırdıq. Messi də onların heyətində idi. İlk olaraq ona qarşı fərdi müdafiə qurduq. Lakin 70-ci dəqiqədə onu zərərsizləşdirən oyunçumu əvəzlədim və növbəti 15 dəqiqə ərzində bizə düz dörd qol vurdular”.