UEFA Çempionlar Liqasının əsas mərhələsində “Sabah”ın rəqiblərindən olan “Borussiya” (Dortmund) ilə “Vilyarreal” qarşılaşmasında qorxulu anlar yaşanıb. Almaniya klubunun gənc ulduzu Konstantinos Karetsas səhhətində yaranan ciddi problemlərə görə matç zamanı xəstəxanaya aparılıb.

Dortmund təmsilçisinin açıqlamasına görə, 18 yaşlı yunanıstanlı futbolçunun matç zamanı qan dövranında problem yaranıb. Heç bir rəqib müdaxiləsi olmadan qazonun üzərin yıxılaraq əlini qaldıran və kömək istəyən gənc yarımmüdafiəçinin bu hərəkəti tribunada və meydanda şok effekti yaradıb. Bir neçə dəqiqə əvvəl uğurlu ötürmə edən futbolçunun zədə deyil, birbaşa yuxarı bədən nahiyəsi və qan dövranı ilə bağlı narahatlıq yaşaması həkimlərin dərhal müdaxiləsinə səbəb olub.

Yayda “Genk”dən transfer olunan və “sarı-qaralar”ın heyətində ötən gecə karyerasında beşinci matçına çıxan Karetsas meydançanı xərəkdə tərk edib. Klubdan verilən son məlumata görə, futbolçunun vəziyyəti stabildir və o, ətraflı müayinə üçün xəstəxanaya yerləşdirilib.

Dortmundda keçirilən qarşılaşmanın 27-ci dəqiqəsində Karetsasın əvəzinə “Arsenal”dan icarəyə götürülən İtan Nvaneri mübarizəyə qoşulub. Gərgin keçən matçda almanlar Renato Veyqanın avtoqolu ilə hesabı açsalar da, “Vilyarreal” 66-cı dəqiqədə Santyaqo Mourinonun qolu ilə tarazlığı bərpa edib. Lakin matçın sonuna doğru səhnəyə çıxan Seru Girassi 80 və 85-ci (penaltidən) dəqiqələrdə fərqlənərək “Borussiya”nı irəli çıxarıb. Matçın son dəqiqələrində yenə Girassinin avtoqolu ilə fərq ensə də (3:2), Dortmund klubu üç xalı qorumağı bacarıb.