“Neftçi”nin baş məşqçisi Yuri Vernidub komandanın təlim-məşq toplanışının yekunları, transfer çalışmaları və Avropa kuboklarındakı hədəfləri barədə geniş açıqlama verib.

Hazırlıq prosesini yüksək qiymətləndirən ukraynalı mütəxəssis, ağır fiziki yükləmələrə baxmayaraq, planlaşdırılan bütün yoxlama oyunlarını uğurla başa vurduqlarını bildirib. Toplanış müddətində heç bir futbolçunun zədələnməməsini ən müsbət məqam kimi vurğulayan Vernidub, komandanın mövsümə yaxşı bünövrə ilə başladığını qeyd edib.

Azarkeşlərin yeni mövsümdə komandadan böyük gözləntilərinin olduğunu vurğuluyan təcrübəli çalışdırıcı, böyük vədlər verməkdən çəkinsə də, iddialı danışıb. O, “Neftçi”nin minimum hədəfinin Konfrans Liqasının əsas mərhələsinə vəsiqə qazanmaq olduğunu və bunun üçün bütün imkanların səfərbər edildiyini vurğulayıb. Lakin baş məşqçi bu yolun asan olmayacağını və hazırda bütün diqqətin təsnifat mərhələsindəki ilk rəqibə yönəldiyini bildirib.

Konfrans Liqasındakı rəqibləri olan “Dinamo” (Minsk) klubunun hazırkı durumunu dəyərləndirən Vernidub, rəqibin Belarus çempionatının lideri kimi turnir ritmində olduğunu və onları olduqca çətin iki oyun gözlədiyini diqqətə çatdırıb. Bununla belə, baş məşqçi komandasının bu sınağa tam hazır olduğunu bəyan edib.

“Neftçi”nin transfer fəaliyyətinə də toxunan ukraynalı mütəxəssis, artıq 4 yeni oyunçunun heyətə qatıldığını, lakin güclənmək prosesinin bitmədiyini söyləyib. Səhv etmək istəmədiklərini bildirən Vernidub, transfer bazarında konkret mövqelər üzrə işlədiklərini gizlətməyib: “Hansı mövqeləri gücləndirməli olduğumuzu yaxşı bilirik. Hazırda hücum xəttinə sağ vinger və mərkəzə “səkkiz nömrə” funksiyasını yerinə yetirəcək yarımmüdafiəçi axtarışındayıq”.

Yerli bazardan da danışan baş məşqçi, Rüfət Abbasovun transferindən məmnunluğunu ifadə edib. O, eyni zamanda klubun akademiyasına xüsusi önəm verdiklərini və artıq iki gənc istedadı əsas komandanın düşərgəsinə cəlb etdiklərini bildirib.