Çempionlar Liqasının I təsnifat mərhələsi çərçivəsində sabah Uelsin “Nyu-Sents” klubunu qəbul edəcək “Sabah”ın baş məşqçisi Valdas Dambrauskas matçdan öncə mətbuat konfransı keçirib. Masazırda baş tutacaq qarşılaşma ərəfəsində litvalı mütəxəssis komandanın hazırlıq durumu və rəqib barədə fikirlərini bölüşüb.
Yeni mövsümün başlaması münasibətilə hər kəsi təbrik edən Dambrauskas, Azərbaycanı Çempionlar Liqasında təmsil etməyin böyük şərəf və məsuliyyət olduğunu vurğulayıb: “Ümid edirəm ki, bu mövsüm bizim üçün ən azı ötənilki qədər uğurlu alınacaq. Çempionlar Liqasında ölkəmizi təmsil etmək bizə həm böyük qürur verir, həm də üzərimizə ciddi məsuliyyət qoyur. Sabahkı matçı böyük həyəcan və intizarla gözləyirik. Avstriyadakı iki həftəlik hazırlıq prosesi yüksək səviyyədə keçdi. Komandamız tam hazırdır. Sabah meydanda ən yaxşı oyunumuzu nümayiş etdirəcəyimizə 100 faiz əmin ola bilərsiniz”.
Baş məşqçi komandanın təlim-məşq toplanışındakı çıxışından və yeni transferlərin adaptasiya prosesindən razılığını ifadə edib. Avstriyada çox güclü rəqiblərlə qarşılaşdıqlarını və keyfiyyətli toplanış keçdiklərini bildirən mütəxəssis, hazırlıq səviyyəsini belə qiymətləndirib: “Bu müddətdə 21 məşqimiz baş tutdu. Əlbəttə, bu sayın 25-26 olmasını istərdim, lakin ümumi mənzərə müsbətdir. Futbolçularımız yaxşı formadadırlar. Heyətimizə qoşulan yeni oyunçuların adaptasiyası üçün bu toplanış əla fürsət oldu”. Dambrauskas komandanın ötən mövsümlə müqayisədə daha üstün vəziyyətdə olduğunu vurğulayaraq, “Keçən ilin analoji dövrü ilə müqayisədə klub olaraq irəliyə doğru böyük bir addım atmışıq. Bu dəfə mövsümə daha yaxşı hazırlıqla başlayırıq”.
Rəqib “Nyu-Sents” klubunun analizini futbolçularına çatdırdığını bildirən Dambrauskas, Uels təmsilçisinin təhlükəli tərəflərinə diqqət çəkib: “Rəqibin detallı analizini artıq komandama təqdim etmişəm. ‘Nyu-Sents’ olduqca təcrübəli komandadır, heyətində uzun illərdir bir yerdə oynayan futbolçular var. Ötən mövsüm daxili çempionatda ən yaxın izləyicisini 20 xal qabaqlayıblar. Meydana yalnız qələbə üçün çıxan bir rəqiblə oynayacağıq. Onlara xırda bir boşluq versəniz, bundan maksimum istifadə edəcəklər. Ona görə də biz ilk növbədə öz oyunumuza konsentrasiya olmalı və səhvə yol verməməliyik”.