UEFA Avropa Liqasının II təsnifat mərhələsində Bolqarıstanın ÇSKA klubu ilə ev oyununda qolsuz bərabərliyə razılaşan “Qarabağ”ın baş məşqçisi Qurban Qurbanov oyundan sonra mətbuat konfransına qatılıb. Təcrübəli mütəxəssis qarşılaşmanın gedişatı, komandasının oyunu, isti hava şəraitinin təsiri və cavab oyunu öncəsi gözləntilərini jurnalistlərlə bölüşüb.
Görüşün ilk dəqiqələrindən gərgin keçdiyini bildirən Qurban Qurbanov, rəqibin taktiki baxımdan çevik olduğunu vurğulayıb: “Çox yaxşı komandaya qarşı oynayırdıq. Birəbir mübarizələri üstün yerinə yetirən rəqib var idi. Etiraf edək ki, azarkeşlər üçün o qədər də baxımlı oyun alınmadı. Amma ümumən bu qarşılaşma hər iki komanda üçün tanışlıq xarakteri daşıyırdı. ÇSKA müxtəlif sistemlərdə oynamağı bacaran komandadır və zaman-zaman bizi çətinliyə saldı. Səhvlərimiz olsa da, futbolçular oyun ritmindən çıxmadılar. Cavab matçı daha da çox düşünməli olacağımız maraqlı bir mübarizəyə səhnə olacaq.”
Təcrübəli mütəxəssis havanın bürkülü olmasının futbolçuların enerjisinə mənfi təsir etdiyini gizlətməyib: “Şərait hər iki komanda üçün eyni idi. Lakin futbolçular bu havada həddən artıq enerji itirirlər. Birəbir mübarizələri sevən rəqibə qarşı enerji azlığı yarandıqda istədiyini meydanda gerçəkləşdirmək çətinləşir. Hava sərin olsaydı, şübhəsiz ki, daha dinamik oyun izləyərdik.”
Elvin Cəfərquliyevin performansı və heyətdəki rəqabətə toxunan Qurban Qurbanov, əsas heyətin hələ tam formalaşmadığını bildirib: “Mən özüm də hələ əsas heyəti tam formalaşdırmamışam. Elvin və ya başqa bir futbolçu – kim bu cür istəkli davam etsə, təbii ki, start heyətində yer alacaq. Önümüzdəki günlərdə bu məsələlər daha da qətiləşəcək. Heyətdə rotasiyalar və dəyişikliklər tədricən artacaq”.
Jurnalistlərin Bolqarıstan mətbuatının heç-heçəyə sevinməsi və “Ludoqorets”lə keçmiş tarixi matçla bağlı suallarını cavablandıran Qurbanov, açıqlamaları ilə diqqət çəkib: “Rəqiblər də, biz də zamanla dəyişirik. Futbol o qədər inkişaf edib ki, “Biz həmin “Qarabağ”ıq” desək, yanlış olar. Biz həmişə olduğumuzdan daha yaxşı olmalıyıq. Artıq hamı bizə daha ciddi və fərqli gözlə yanaşır.
ÇSKA-nın evə sərfəli nəticə ilə dönməsinə sevinməsi normaldır. Səfərdə oynayırdılar və yaxşı performans göstərdilər. Cavab oyununa gəlincə, biz Sofiyaya yalnız qalibiyyət üçün gedəcəyik. Amma orada baş verəcək hər hansı nəticəni sürpriz saymaram. Hər iki klubun gücü və Avropa təcrübəsi bərabər səviyyədədir. ÇSKA-nın da bizi məğlub etmək gücü var, bizim də. Sofiyada daha diqqətli, daha səbirli olmalıyıq”. Komandanın adət olunmuş bol qol fürsətləri yarada bilməməsinə toxunan baş məşqçi, bunun bir çox səbəbi olduğunu bildirib. Yeni transferlərin adaptasiya prosesi, ümumi fiziki hazırlıq və rəqibin müdafiədəki nizam-intizamlı oyunu bu amillər arasındadır. Qurbanov vurğulayıb ki, komanda daxilindəki çatışmazlıqlar təhlil olunacaq və cavab oyununadək aradan qaldırılacaq.