UEFA Avropa Liqasının II təsnifat mərhələsində “Qarabağ”la səfərdə qolsuz bərabərliyə nail olan Bolqarıstanın ÇSKA klubunun baş məşqçisi Xristo Yanev matçdan sonra mətbuat konfransı keçirib. Qonaq komandanın çalışdırıcısı Bakıdakı gərgin mübarizəni, taktiki gedişləri və Sofiyadakı cavab oyunu öncəsi şansları dəyərləndirib.

Bolqarıstanlı jurnalistlərin alqışları ilə zala daxil olan Yanev, “Qarabağ” kimi təcrübəli rəqiblə səfər matçında əldə edilən bərabərliyin onlar üçün uğurlu göstərici olduğunu gizlətməyib: “Bizim üçün bu oyun həddən artıq vacib idi. “‘Qarabağ” çox güclü və keyfiyyətli heyətə malik klubdur, bunu hər kəs yaxşı bilir. Ona görə də matçdan öncə vəziyyətin bizim əleyhimizə dəyişə biləcəyini düşünənlər çox idi. Səfərdəki bu bərabərlik bizim üçün həqiqətən yaxşı nəticədir. Futbolçularım meydanda böyük əzmkarlıq və motivasiya nümayiş etdirdilər”.

Oyunun gedişinə toxunan mütəxəssis, fasilədə futbolçularına verdiyi xüsusi tapşırıqlardan söz açıb: “İkinci hissədən öncə soyunub-geyinmə otağında futbolçularıma daha ehtiyatlı oynamağı tapşırdım. “Qarabağ” hücumda çox təhlükəli idi. Bizim əsas planımız ilk növbədə qol buraxmamaq, intizamı qorumaq və eyni zamanda fürsət düşdükcə hücumlar təşkil etmək idi. Sevindiricidir ki, tapşırıqların öhdəsindən gələ bildik”.

UEFA-nın cəzası səbəbindən Bakıda azarkeş dəstəyindən məhrum olan ÇSKA-nın çalışdırıcısı, Sofiyadakı cavab qarşılaşmasında tam fərqli bir atmosfer və oyun izləyəcəyimizi bildirib: “Cavab matçında öz azarkeşlərimizin möhtəşəm dəstəyi arxamızda olacaq. Dolan stadion və azarkeşlərimizin coşğusu komandamızı yalnız irəli aparacaq. Aydındır ki, Sofiyadakı görüşdə oyun sxemində dəyişikliklər edəcəyik. Bakıdakı matçda buraxdığımız səhvləri artıq bilirik və həmin mövqelərdə lazımi düzəlişlər aparacağıq. Cavab oyununa çox böyük ümidlərlə baxırıq və mərhələ adlayacağımıza inamımız tamdır”.