Zinedine Zidanın Fransa millisinin baş məşqçisi postuna rəsmi təyinat tarixi bəlli olub. Nüfuzlu “L’Equipe” nəşrinin məlumatına görə, Fransa Futbol Federasiyası (FFF) 54 yaşlı əfsanəvi mütəxəssislə əməkdaşlığı iyulun 28-də rəsmən elan edəcək.

Hadisənin xüsusi mətbuat konfransı ilə ictimaiyyətə təqdim olunacağı gözlənilir. Fransalı mütəxəssisin millinin sükanı arxasında 4 illik müqaviləyə imza atacağı bildirilir.

Yığmanın yeni məşqçilər korpusunun tam formalaşdırılması isə avqust ayına planlaşdırılır.

Zidanın rəhbərlik edəcəyi yeni heyətdə də kifayət qədər tanınmış simalar yer alacaq. Fransalı mütəxəssisin əvvəlki uğurlu illərində yanında addımlayan David Betoni və Hamidou Msaidie yenidən onun əsas köməkçiləri kimi fəaliyyət göstərəcəklər. Məşqçilər korpusuna fiziki hazırlıq üzrə mütəxəssis Qreqori Düponun, habelə Fransa milli komandasının keçmiş ulduz futbolçuları Fabien Bartez və Bernar Diomedin də qoşulması gözlənilir. Paralel olaraq, Fransa Futbol Federasiyası məşqçilər korpusunda qadın mütəxəssislərin də təmsilçiliyini artırmağı hədəfləyir.

Xəbərdə həmçinin qeyd olunur ki, federasiya 14 il komandaya rəhbərlik etmiş Didye Deşama xidmətlərinə görə xüsusi ehtiram göstərmək və təntənəli şəkildə vidalaşmaq istəyir. Lakin təcrübəli mütəxəssis FFF-nin bu təklifinə hələ ki cavab verməyib.