Bir vaxtlar “Qarabağ”ın şərəfini qorumuş, hazırda Bolqarıstanın “Minyor” klubunda çıxış edən yarımmüdafiəçi Simeon Slavçev “DIEMA SPORT” kanalının “Futbol Evi” verilişində diqqətçəkən açıqlamalar verib.
Təcrübəli futbolçu Avropa Liqası çərçivəsində keçiriləcək “Qarabağ” – ÇSKA (Sofiya) matçını təhlil edərək, Ağdam təmsilçisinin oyun fəlsəfəsini, Qurban Qurbanovun idarəçilik modelini və qarşılaşmanın taktiki incəliklərini bölüşüb.
Slavçev bildirib ki, “Qarabağ” illər ərzində nə qədər dəyişsə də, öz oyun kimliyini və sabitliyini mükəmməl şəkildə qoruyub saxlayır: “Sükan arxasında 15 ildən çoxdur ki, Qurban Qurbanov dayanır. “Qarabağ” saat kimi dəqiq işləyən vahid bir mexanizmdir, bura qədəm qoyan hər bir futbolçu meydandakı rolunu və tapşırığını əla dərk edir. Onların oyun üslubu “Mançester Siti” “Sportinq” və “Benfika”nı xatırladır. “Liverpul” və ya “Nyukasl” kimi nəhənglərə qarşı oyunlarda belə öz fəlsəfələrindən imtina etmirlər. Topa nəzarət etməkdən qorxmurlar və elə buna görə də Avropada bu qədər irəli gedə biliblər”.
Ağdam klubunun idarəçilik modelini yüksək qiymətləndirən bolqarıstanlı yarımmüdafiəçi, Qurban Qurbanovun daim öz üzərində işlədiyini vurğulayıb: “Azərbaycan futbolunu köhnə metodlarla assosiasiya edənlər tamamilə yanılırlar. “Qarabağ”da ən yüksək Avropa standartları tətbiq olunur. Baş məşqçi “Mançester Siti”, “Roma”, “Bayer” kimi nəhəng klublarda mütəmadi təcrübə keçir. Komandada təşviş, qorxusu yoxdur — hətta titulu itirəndə belə soyuqqanlılığı qoruyurlar. Onların uğurları tamamilə təbii və müasir futbol innovasiyalarına söykənir”.
Matçdan öncə heç kimin onunla əlaqə saxlamadığını bildirən Slavçev, ÇSKA üçün matçın taktiki açarını təqdim edib: “Mənə nə ÇSKA-dan, nə də “Qarabağ”dan zəng ediblər. Halбуki “Qarabağ”ın üslubunu yaxşı bildiyim üçün çox faydalı ola bilərdim. “Qarabağ” topu itirdikdən sonra ilk 4-5 saniyə ərzində çox aqressiv presinq tətbiq edir. Mərkəz müdafiəçiləri hücuma qoşulanda cinah müdafiəçiləri çox irəli çıxır. ÇSKA məhz bu cinahların arxasındakı bosluqlardan sürətli əks-hücumlarla yararlanmalıdır”.
Slavçev Sofiya təmsilçisinə mərkəzdə “Qarabağ”la açıq futbola girməməyi tövsiyə edib: “ÇSKA yarımmüdafiədə “Qarabağ”ı üstələməyə çalışsa, məğlub olacaq. Çünki azərbaycanlıların avrokubok təcrübəsi qat-qat çoxdur. Bakıda 0:0 hesabı ÇSKA üçün əla nəticə olardı, çünki cavab oyununda öz azarkeş faktoru rol oynaya bilər. Şəxsən mən “Qarabağ”ın önə keçəcəyini gözləyirəm, amma futbol hər zaman sürprizlərlə doludur”.