İlk 45 dəqiqə ərzində meydanda yalnız bir komanda var idi: “Zirə” topa nəzarəti tam olaraq ələ keçirmiş, rəqib qapısına 10 zərbə endirmişdi. Estonlar isə “Zirə”nin təzyiqi qarşısında çaşqın düşərək ilk yarıda təmsilçimizin qapısına bir zərbə də vurmağı bacarmadılar. Lakin hücumların məntiqi sonluqla bitməməsi komandaların fasiləyə qolsuz bərabərliklə yollanmasına səbəb oldu.
Fasilədən sonra “Payde” oyunda dönüş yaratmağa çalışdı. Meydan sahibləri 56-cı dəqiqədə matçda ilk təhlükəli zərbələrini vurdular, Badamosinin başla zərbəsini qapıçı Aydın Bayramov çətinliklə künc zərbəsinə çıxardı.
Oyunun sonlarına doğru hər iki məşqçi ard-arda əvəzetmələrə əl atdı. “Payde”nin meydana sonradan daxil olan hücumçuları təzyiqi artırmağa başladılar. Bütün qarşılaşmanın gedişatına zidd olan qol isə 87-ci dəqiqədə gəldi. Henri Anierin təhlükəli zərbəsini Aydın Bayramov yenidən möhtəşəm seyvlə qaytarsa da, topa birinci çatan əvəzetmədən meydana daxil olan Pa Abdu Çam oldu. O, təkrar zərbə ilə topu torla görüşdürərək hesabda meydan sahiblərini önə keçirdi.
Qalan qısa vaxt ərzində “Zirə” hesabda tarazlığı bərpa etmək üçün irəli atılsa da, “Payde” müdafiəsi təhlükənin qarşısını ala bildi.
Oyunun ümumi mənzərəsinə baxdıqda “Zirə”nin bu məğlubiyyəti məntiqsiz görünsə də, futbol imkanlardan istifadə etməyənləri bağışlamır.
Cütün taleyinə iyulun 30-da Sumqayıtdakı Mehdi Hüseynzadə adına şəhər stadionunda keçiriləcək cavab qarşılaşmasında aydınlıq gələcək.
“Payde” (Estoniya) – “Zirə” (Azərbaycan) 1:0 (0:0)
Qol: Pa Abdu Çam, 87 (1:0)
Baş hakim: Roman Jitari (Moldova).
“Payde”: Ebrima Jarju, Nikita Baranov, Viktor Uqo, Edqar Tur, Mikael Lilander, Oskar Hıym (k), Modu Sohna (Daniel Kabral, 77), Martin Miller (Xenrik Oyamaa, 79), Daniel Luts (Kristofer Piht, 86), Siim Luts (Pa Abdu Çam, 79), Abdurahman Badamosi (Xenri Anier, 79).
“Zirə”: Aydın Bayramov, Ruan Renato, Amin Seydiyev, Qismət Əliyev (k), İssa Djibrilla (Anje Mutsinzi, 75), Brahim Konate, Guima (İsmaıl İbrahimli, 60), Vyerinya (Giorgi Papunaşvili, 75), Eren Aydın, Junior Martins (Kris Digbeu, 60), Davit Volkov.
Sarı vərəqələr: S. Luts, N.Baranov – A.Seydiyev