İspaniya millisinin kapitanı kimi komandasını dünya çempionluğuna daşıyan və turnirin ən yaxşı futbolçusu seçilən Rodri yenidən zədə problemi ilə üzləşib.

“The Athletic” nəşrinin məlumatına görə, təcrübəli yarımmüdafiəçinin yay istirahəti planlaşdırıldığından daha qısa olacaq. Bel nahiyəsindən ciddi zədə alan ispan futbolçunun əməliyyat olunacağı bildirilir.

“Mançester Siti” hələlik bu xəbəri rəsmi şəkildə təsdiqləməyib. Zədənin ağırlıq dərəcəsi və Rodrinin yaşıl meydanlardan nə qədər uzaq qalacağı da hələ məlum deyil. İngiltərə Premyer Liqasının yeni mövsümünün başlamasına təxminən bir ay qalmış bu xəbər “şəhərlilər”in hazırlıq planlarına ciddi təsir göstərə bilər.

Son illər Rodri ardıcıl zədələrdən əziyyət çəkir. O, 2024-cü ildə dizinin ön çarpaz bağlarını qopardığı üçün demək olar ki, bütün mövsümü buraxmışdı. Uzunmüddətli bərpa prosesindən sonra meydana qayıdan yarımmüdafiəçi yenidən sağlamlıq problemləri ilə üzləşdi. Qasıq və baldır əzələsindəki zədələr səbəbindən o, “Mançester Siti”nin ötən mövsüm Premyer Liqanı ikinci pillədə başa vurduğu çempionatda 38 oyunun cəmi 17-də start heyətində yer alıb.

Maraqlıdır ki, Rodri karyerasının ən uğurlu mərhələlərindən sonra ardıcıl zədələr alır. O, 2024-cü ildə “Qızıl top” mükafatını qazandıqdan qısa müddət sonra ağır zədə ilə sıradan çıxmışdı. Bu dəfə isə İspaniya millisinin heyətində dünya çempionu olduqdan və turnirin ən yaxşı futbolçusu seçildikdən sonra yenidən əməliyyat ehtimalı ilə üz-üzə qalıb.

Zədə problemləri ilə yanaşı, Rodrinin “Mançester Siti”dəki gələcəyi də sual altındadır. İspaniyalı futbolçunun klubla müqaviləsinin müddəti cəmi bir ildən sonra başa çatacaq. O, hələlik yeni müqavilə imzalamağa tələsmir. Məlumata görə, yarımmüdafiəçinin vəziyyətini yaxından izləyən və onun transferində ən ciddi maraqlı tərəf kimi göstərilən klub “Real”ıdır. Burada hesab edirlər ki, Rodri tam sağaldıqdan sonra komandanın orta xəttini gücləndirə biləcək əsas namizədlərdən biridir.