Çempionlar Liqasının pley-off mərhələsində “Sabah”a əlavə vaxtda 2:5, ümumi hesabda isə 4:6 hesabı ilə məğlub olaraq mübarizəni Avropa Liqasında davam etdirəcək “Hapoel” (Beer-Şeva) klubunun baş məşqçisi Ran Kojux qarşılaşmadan sonra keçirilən mətbuat konfransında diqqətçəkən açıqlamalar verib.

Əsas vaxtın başa çatmasına cəmi 17 saniyə qalmış qol buraxaraq Çempionlar Liqasının əsas mərhələsinə vəsiqə şansını əldən verən israilli mütəxəssis ağır məğlubiyyətin məyusluğunu gizlətməsə də, komandasının gələcəyinə nikbin yanaşdığını bildirib.

Kojux “Sabah”ın sonadək mübarizəsini və xarakterini xüsusi qeyd edib: “Biz belə məğlubiyyətlərdən dərs çıxarır, daha da güclənirik. İsraildə son saniyələrdə Çempionlar Liqasına vəsiqə şansını itirən böyük məşqçilər olub. Deməli, mən də pis qrupda deyiləm. “Hapoel” bu səviyyədə oynamağa layiq olduğunu göstərdi.

Futbolda əldə etdiyimiz bütün uğurlara məhz belə uğursuzluqlardan sonra nail olmuşuq. Heç kim məni sınmış görməyəcək. Biz Çempionlar Liqasına vəsiqə qazanmaq istəyirdik, amma “Sabah” bunu daha çox istədiyini göstərdi. Rəqibimiz həqiqətən böyük qəhrəmanlıq nümayiş etdirdi”.

İsrail klubunun baş məşqçisi qarşılaşma zamanı yaşanan fiziki problemlərdən və Cibril Diopun 100-cü dəqiqədə qırmızı vərəqə alaraq komandasını azlıqda qoymasından da danışıb: “Meydandan çıxardığım bütün futbolçular – əvvəlcə İqor Zlatanoviç, daha sonra Niv Yehoşua və İtai Rotman – özləri əvəzlənmələrini xahiş etdilər. Futbolçular fiziki cəhətdən tamamilə tükənmişdilər. Bu da həm taktiki dəyişikliklər etməyi, həm də oyunun gedişinə nəzarəti olduqca çətinləşdirdi.

Hakimin bizə nə üçün bu qədər sarı vərəqə göstərdiyini də anlamadım. Diopun qırmızı vərəqə alması isə məni həqiqətən qəzəbləndirdi. Bu, baş verməməli olan və oyunun taleyinə ciddi təsir edən kritik dönüş nöqtəsi idi”. Məğlubiyyətə baxmayaraq futbolçularının fədakarlığını yüksək qiymətləndirən 46 yaşlı mütəxəssis mübarizənin davam etdiyini bildirib: “Əsas vaxtın bitməsinə 20 saniyə qalmış qol buraxdıq, nəzarətimizdən kənar anlar yaşandı. Amma oyunçularım bu gün meydanda bütün qüvvələrini qoydular və mən onlara minnətdaram. Çempionlar Liqası arzumuz sarsılsa da, qarşıda bizi Avropa Liqasının çətin turniri və daxili çempionat gözləyir. İnanıram ki, bu komanda ilə hələ çox uğurlu günlərimiz olacaq”.