“Qəbələ”nin idman direktoru Səbuhi Səfiyarlı UEFA-nın həmrəylik ödənişlərindən əldə olunacaq vəsaitin hansı istiqamətlərə yönəldiləcəyi barədə danışıb: “Vəsaiti xərcləməli olduğumuz yerlər kifayət qədərdir. Bütün məbləği infrastrukturun yenilənməsinə sərf etməyi planlaşdırırıq. Bizim altı təbii ot örtüklü, həmçinin süni örtüklü meydançalarımız var ki, onların saxlanılması böyük xərclər tələb edir.

Paytaxt klubları üçün bu məsələ daha asandır və bir neçə meydança icarəyə götürməklə kifayətlənə bilirlər. Bizim isə belə imkaanımız yoxdur. Qəbələdə öz infrastrukturumuza sahib olmalı və onu qorumalıyıq. Buna görə də pullar infrastrukturun saxlanılmasına və təkmilləşdirilməsinə xərclənəcək.

Əgər artıq vəsait qalarsa, ötən il güclü külək nəticəsində ciddi zədələnmiş süni örtüklü qapalı maneji təmir etmək niyyətindəyik. Bu vəsait bizə kömək olacaq, lakin təəssüf ki, bütün cari ehtiyaclarımızı tam qarşılamır”, – deyə S.Səfiyarlı bildirib.

Xatırladaq ki, “Qarabağ”ın Çempionlar Liqasındakı uğurlu çıxışı sayəsində Premyer Liqanın hər bir klubu UEFA-dan 1 600 000 manat məbləğində vəsait əldə edəcək.