“Sabah”a dramatik şəkildə məğlub olaraq Çempionlar Liqası ilə vidalaşan İsrailin “Hapoel” (Beer-Şeva) klubunda məyusluq davam edir.

İsrail təmsilçisinin baş məşqçisi Ran Kojukun həyat yoldaşı Adreta sosial şəbəkə hesabında paylaşım edərək komandanın yaşadığı ağır məğlubiyyətə münasibət bildirib.

“Sabah” cavab oyununda “Hapoel”i əlavə vaxtda vurduğu qollarla 5:2, iki matçın nəticəsinə görə isə 6:4 hesabı ilə məğlub edib. İsrail klubu əsas mərhələyə vəsiqə qazanmağa cəmi 15 saniyə qalmış həlledici qolu buraxaraq mübarizəni dayandırıb.

Adreta Kojuk bu dramatik sonluğa baxmayaraq, komandanın turnirdəki yolunu yüksək qiymətləndirib: “Futbolda elə anlar olur ki, onları sözlə ifadə etmək çətindir. Dünən böyük bir arzunun gerçəkləşməsinə cəmi 15 saniyə qalmışdı. Çempionlar Liqasının qrup mərhələsinə vəsiqədən cəmi 15 saniyə uzaqda idik. Sonra isə qəddar və ağrılı bir an yaşandı. Belə bir məqamı qəbul etmək, xüsusilə də uzun, cəsarətli və həyəcanlı yoldan sonra, çox çətindir”.

Kojuk daha sonra məğlubiyyətin komandanın bütün mövsüm ərzində gördüyü işləri kölgədə qoymamalı olduğunu vurğulayıb: “Bu futbol yolunda öyrəndiyim bir şey varsa, o da budur ki, son an heç də həmişə bütün mənzərəni əks etdirmir. Bizim hekayəmiz bu yoldan ibarətdir. “Bu, inamını itirməyən komandanın, meydanda sonadək mübarizə aparan futbolçuların, çalışmaqdan, arzulamaqdan və inanmaqdan heç vaxt vaz keçməyən insanların hekayəsidir”.

Baş məşqçi Ran Kojuka xüsusi müraciət edən Adreta onun arzusuna və çəkdiyi zəhmətə də toxunub: “Ran, “Hapoel”i bura gətirməyi nə qədər istədiyini bilirəm. Nə qədər çalışdığını, nə qədər inandığını və bu yolun hər dəqiqəsində ürəyinin sizinlə olduğunu bilirəm. Bilirəm ki, indi də, bütün bu ağrı və məyusluğun içində, artıq irəliyə baxırsan”.

O, paylaşımını təsirli fikirlərlə yekunlaşdırıb: “Son fitə 15 saniyə qalmış yarımçıq qalan arzu yox olmuş arzu demək deyil. Bu, həmin arzunun mümkün olduğunu sübut edən bir yoldur. Bu yol, ürəyin və inamın üçün sənə təşəkkür edirəm. İndi isə irəli gedirik”.

Beləliklə, “Hapoel” üçün Çempionlar Liqası macərası ən acı ssenarilərdən biri ilə başa çatsa da, komandanın keçdiyi yol İsrail futbolunda uzun müddət müzakirə olunacaq.