Dünya Çempionatının 1/4 finalında Norveçin İngiltərəyə əlavə vaxtda məğlub olmasından (1:2) sonra Skandinaviya ölkəsində kütləvi asayiş pozuntuları və zorakılıq halları qeydə alınıb.
Millinin turnirlə vidalaşması ölkə daxilində böyük məyusluq yaradıb və matçdan dərhal sonra müxtəlif şəhərlərdə insidentlər yaşanıb.
Ən böyük azarkeş kütləsi Osloda, Kral Sarayının qarşısında toplaşıb. VG nəşrinin məlumatına görə, azarkeşlər tərəfindən qanunsuz olaraq qırmızı siqnal raketləri işə salınıb. Atılan raketlərdən biri mühafizəçiyə dəyərək onun xəsarət almasına səbəb olub. Polis xidməti qanunsuz pirotexnika istifadə edənlərin saxlanılaraq məsuliyyətə cəlb olunacağını bildirib. Paytaxtın təcili tibbi yardım xidmətinə gecə yarısından səhər saat 7-dək 45 nəfər müraciət edib. Zorakılıq dalğası qısa zamanda Norveçin digər şəhərlərini də bürüyüb. Stavangerdə kütləvi davalar zamanı bir neçə gənc döyülüb, “DNB Arena”da isə bir qadın zərbədən huşunu itirib. Skiendə ağır kəllə-beyin travması alan şəxs təcili tibbi yardımla xəstəxanaya aparılıb. Muşöendəki davada bir nəfərin barmağı qopardılıb, Harstad və Tromsödə isə qadına hücum edən və polislə əlbəyaxa olan şəxslər saxlanılıblar. Şiddət hadisələri Tronxeym və Vestvoqoy şəhərlərində də kütləvi davalarla müşayiət olunub.