UEFA Çempionlar Liqasının III təsnifat mərhələsində “Sabah”ı qəbul edəcək Danimarka çempionu AGF (“Orxus”) artıq oyunun hazırlıqlarını yekunlaşdırır. Klubun rəsmi saytında yayımlanan yazıda avqustun 4-də keçiriləcək ilk qarşılaşmanın “Ceres Park Veylbi” stadionunda əsl Avropa futbolu ab-havasında baş tutacağı vurğulanıb.

Məqalədə qeyd olunur ki, AGF əvvəlki mərhələdə Polşanın “Lex” (Poznan) klubunu dramatik penaltilər seriyasında 9:8 hesabı ilə məğlub edərək “Sabah”la duelə vəsiqə qazanıb. İlk oyun Orxusda, cavab qarşılaşması isə avqustun 11-də Bakıda keçiriləcək.

Danimarka klubu üçün bu mövsüm xüsusi əhəmiyyət daşıyır. AGF ötən mövsüm 40 ildən sonra ölkə çempionu olmaqla UEFA Çempionlar Liqasına vəsiqə qazanıb. 2025-ci ilin fevralından komandanın müvəqqəti ev arenası olan “Ceres Park Veylbi” isə ilk dəfə bu səviyyədə Avropa kuboku oyununa ev sahibliyi edəcək.

Təxminən 12 min tamaşaçı tutumuna malik stadionun tam dolacağı gözlənilir. Klub azarkeşləri qarşılaşmaya əvvəlcədən gəlməyə və biletlərini AGF-nin mobil tətbiqində aktivləşdirməyə çağırıb. Biletlərin yalnız onlayn satıldığı, stadionun kassalarında satışın aparılmadığı da xüsusi qeyd olunub.

AGF yeni “Konqelunden” stadionunun tikintisi başa çatanadək ev oyunlarını “Ceres Park Veylbi”də keçirəcək. Klubun 2027-ci ilin martında yeni arenaya köçməsi planlaşdırılır. Həmin vaxta qədər isə “Ceres Park Veylbi” həm Danimarka çempionunun əsas evi, həm də Avropa kuboku oyunlarının keçirildiyi meydan olacaq.