Azərbaycanın mötəbər idman tədbirlərindən biri olan “Bakı–Xankəndi” beynəlxalq velosiped yarışı uğurla yekunlaşıb. Beş mərhələdən ibarət olan bu marafonun həlledici final mərhələsi gərgin mübarizə və sürətli finişlə yadda qalıb.

Yarışın Tərtər şəhərindən start götürən və Xankəndidə tamamlanan V mərhələsi (181,5 km) beynəlxalq arenada tanınan İspaniyanın “Burqos” komandasının üzvü, Yeni Zelandiyalı velosipedçi Coş Barnettin qələbəsi ilə nəticələnib. O, məsafəni bütün rəqiblərindən daha qısa zamanda qət edərək fəxri kürsünün ən yüksək pilləsinə qalxıb.

Beş gün davam edən marafon boyunca hər bir mərhələ öz dramatikliyi və sürətli finişləri ilə yadda qaldı. Yarışın ilk günündən etibarən dünya səviyyəli pro-kontinental komandalar arasında amansız rəqabət müşahidə olundu.

arışın açılış mərhələsində Çinin “Li-Ninq Star” komandasının belaruslu legioneri Aleksey Şnirko rəqiblərini geridə qoyaraq ilk sarı köynəyin sahibi oldu. II və III mərhələlərdə “XDS Astana” (Qazaxıstan) komandası öz gücünü nümayiş etdirdi. Müvafiq olaraq Yevgeni Fyodorov və Qleb Suritsa ardıcıl qələbələrlə komandalarının üstünlüyünü təmin etdilər. IV mərhələdə isə səhnəyə İtaliyanın məşhur “Bardiani” kollektivi çıxdı. Komandanın üzvü Marko Manenti taktiki gedişləri ilə rəqiblərini üstələyərək bu etabın qalibi adını qazandı.

Bu yarış sadəcə yerli deyil, dünya velosiped idmanının diqqət mərkəzində olan bir hadisə idi. Belə ki, turnir Beynəlxalq Velosipedçilər İttifaqının (UCI) nüfuzlu 2.1 kateqoriyalı təqviminə daxil edilib.

Xatırladaq ki, yarışda dünyanın 20 fərqli ölkəsini təmsil edən 24 peşəkar komanda mübarizə aparıb.  5 mərhələdən ibarət olan veloyürüşün final akkordu Tərtərdən Xankəndiyə qədər uzanan 181,5 kilometrlik çətin, lakin zəfərlə dolu məsafə oldu.