İsveçrənin Bil şəhərində ənənəvi şahmat festivalı davam edir. Turnirin ən güclü qrupu olan “Masters”də qrosmeystermiz Aydın Süleymanlı da mübarizə aparır. Təmsilçimizlə yanaşı, yarışda Levon Aronyan (ABŞ), Yağız Kaan Erdoğmuş (Türkiyə), Le Quanq Lyem (Vyetnam), Mattias Blübaum (Almaniya) və Xose Eduardo Martines Alkantara (Meksika) çempionluq uğrunda yarışırlar.
Festival çərçivəsində klassik şahmat üzrə yarışlara yekun vurulub. Sonuncu – 5-ci turda vyetnamlı Le Quanq Lyemi məğlub edən Aydın Süleymanlı 3 xalla turnir cədvəlinin ilk pilləsində qərarlaşıb.
Qeyd edək ki, qrosmeysterimiz bundan əvvəl keçirilən Fişer şahmatı (şahmat-960) və rapid yarışlarında ikinci yeri tutub. Şahmatçılar sabah blits növündə qüvvələrini sınayacaqlar.