DÇ-2026-da 28 illik həsrətə son qoyaraq tarixində ilk dəfə 1/4 finala yüksələn Norveç millisi yarımfinalın addımlığında İngiltərə maneəsini aşa bilməyib.
Mayamidə baş tutan dramatik matçda hesabı 36-cı dəqiqədə skandinavlar açıblar. Martin Edeqorun ötürməsindən sonra Andreas Şelderup cərimə meydançasının kənarından möhtəşəm zərbə ilə topu tirə dəydirərək tora qovuşdurub – 1:0.
Tomas Tuhelin yetirmələri bu qola fasiləyə yollanmazdan dərhal əvvəl cavab veriblər. 45-ci dəqiqədə Entoni Qordonun ötürməsini Cud Bellingem tək toxunuşla dəqiq tamamlayaraq tarazlığı bərpa edib – 1:1. Hətta ilk hissəyə əlavə olunmuş vaxtda Harri Keyn fərqlənsə də, VAR müdaxiləsindən sonra oyundankənar vəziyyət səbəbindən qol ləğv edilib.
İkinci yarıda hər iki tərəf önə keçmək üçün təhlükəli epizodlar yaradıb. Əvvəlcə Torbyorn Heggimin tora qovuşdurduğu top qayda pozuntusuna görə sayılmayıb, 76-cı dəqiqədə isə David Volfenin başla zərbəsindən sonra top direkteymədən qayıdıb.
Əsas vaxtı 1:1 hesabı ilə başa çatan matçda düyünü əlavə olunan dəqiqələr açıb. 93-cü dəqiqədə səhnəyə yenidən Cud Bellingem çıxıb. “Real Madrid”in yarımmüdafiəçisi qapıçının dəf etdiyi topu tamamlayaraq dublunu rəsmiləşdirib və “üç aslan”ı önə keçirib – 2:1.
Qarşılaşmanın qalan dəqiqələrində üstünlüyünü qoruyan İngiltərə milli komandası DÇ-2026-nın yarımfinalına vəsiqə qazanıb. Tuhelin komandası bu mərhələdə Argentina – İsveçrə cütlüyünün qalibi ilə qarşılaşacaq. Digər yarımfinal cütlüyündə isə Fransa və İspaniya milli komandaları üz-üzə gələcəklər.
Dünya çempionat, 1/4 final
Norveç – İngiltərə 1:2 (əlavə vaxtda)
Qollar: Şelderup, 36 (1:0). Bellingem, 45 (1:1). Bellingem, 93 (1:2).
Hakim: Kleman Türpen (Fransa)
Norveç: Nüland, Volfe (Pedersen, 90), Heggim (Estiqor, 91), Ajer, Ryerson (Eursnes, 60), Berq, Berge, Edeqor, Şelderup (Nusa, 68), Holann (Strann Larsen, 106), Serlot (Bobb, 68)
İngiltərə: Pikford, O`Rayli (Spens, 86), Qehi, Stouns, Konsa (Rodjers, 89), Andersen, Rays (Eze, 46), Qordon (Ceyms, 71), Bellingem (Börn, 111), Madueke (Saka, 46), Keyn.
Sarı vərəqə: Ajer, 117
Stadion: “Hard Rock Stadium” (Mayami, ABŞ)