DÇ-nin ev sahibi olan bütün komandalar 1/8 final mərhələsində çıxışlarını başa vurdular. Kanada və Meksikadan sonra turnirlə ABŞ millisi də vidalaşdı. Amerikalılar Belçikaya böyük hesabla məğlub oldular.
Matçdan əvvəl əsas müzakirə mövzusu Bosniya ilə oyunda qırmızı vərəqə alan Folarin Baloqanın cəzasının ləğv edilməsi ətrafında yaranmış qalmaqal idi. ABŞ prezidenti Donald Trampın təzyiqi ilə qəbul olunduğu zənn edilən bu qərar ətrafında böyük qalmaqal yaranmışdı və FİFA ciddi tənqidə məruz qalırdı. Belə bir vəziyyətdə hətta Trampın ABŞ millisini bu mundialda xeyli irəli aparacağını gözləyənlər də var idi. Lakin xoşbəxtlikdən hər şey meydanda həll olundu və bu turnirdə ən yaxşı oyununu keçirən Belçika millisi meydan sahiblərini darmadağın etdi . ABŞ-ın köməyinə heç Tramp da çata bilmədi. Turnirdə ABŞ millisinin ən məhsuldar bombardiri olan Baloqan start heyətində meydana çıxdı, lakin komandası üçün maksimum fayda verə bilmədi. Bu qalmaqal isə belçikalıları əlavə motivasiya etmişdi. Onlar oyuna çox yaxşı başladılar və Şarl De Ketelarenin dəqiq zərbəsi sayəsində erkən hesabı açdılar.
Amerikalılar uğursuz başlanğıcdan sonra uzun müddət özlərinə gələ bilmədilər. Lakin su fasiləsindən sonra Maurisio Poçettinonun komandası hücumda fəallaşaraq vəziyyəti düzəltdi. Baloqan təhlükəli cərimə zərbəsi qazandı və Malik Tillman onu uğurla yerinə yetirdi. Top Vanakenin başına toxunaraq istiqamətini dəyişdi və Tibo Kurtuanı çıxılmaz vəziyyətdə qoydu. Vanaken ilk hissənin gedişində zədələnən Amadu Onananın əvəzinə təcili olaraq meydana daxil olmuşdu.
İkinci hissədə Amadu Onana qoltuqağacı ilə Belçika millisinin ehtiyat oyunçular skamyasına qayıtdı. Böyük ehtimalla, “qırmızı şeytanlar”ın yarımmüdafiəçisi bu dünya çempionatında artıq meydana çıxmayacaq.
Tillmanın qolundan sonra amerikalıların sevinci uzun çəkmədi. Belçikalılar buraxdıqları qola mükəmməl reaksiya verdilər və qısa müddətdə yenidən önə keçdilər. De Ketelare dublunu rəsmiləşdirdi.
İkinci hissənin əvvəlində ev sahibləri nəhayət oyunda təşəbbüsü tam ələ almış kimi görünürdülər, lakin hücum cəhdləri nəticə vermədi. Üstəlik, ən vacib anda ABŞ millisinin qapıçısı böyük səhvə yol verdi. Friz De Ketelarenin təzyiqi altında topu itirdi, Vanaken isə bu səxavətli “hədiyyədən” maksimum istifadə edərək topu boş qapıya göndərdi.
Hadisələrin bu cür inkişafı amerikalıları sarsıtdı. Buna baxmayaraq, Poçettinonun komandası sonadək mübarizə apardı və möcüzəvi geri dönüş etməyə çalışdı. Oyunun sonlarında Baloqanın fərqlənmək üçün yaxşı imkanı oldu, lakin Folarin yaxın məsafədən Kurtuanı məğlub edə bilmədi. Əvəzində belçikalılar son nöqtəni Romelu Lukakunun qolu ilə qoyaraq ev sahiblərini darmadağın etdilər.
Beləliklə, ABŞ millisi evdə keçirilən dünya çempionatındakı çıxışını başa vurdu. 1/8 finalda mübarizəni dayandırmağı amerikalılar üçün tam uğursuzluq adlandırmaq olmaz. Bununla belə, Poçettinonun komandasının çıxışından “ulduzlu-zolaqlılar”ın bir çox azarkeşinin məyus qaldığı şübhəsizdir.
Belçika isə bu dünya çempionatında bir neçə zəif oyundan sonra ən vacib anda açıq-aşkar turnirdəki ən yaxşı matçını keçirdi, tam haqqı ilə 1/4 finala yüksəldi və burada İspaniya ilə qarşılaşacaq.
Dünya Kuboku, 1/8 final
ABŞ – Belçika 1:4
Sietl. “Lümen Fild” stadionu. 66925 tamaşaçı.
Hakim: Adam Mahadmex (İordaniya).
ABŞ: Fris, Frimen, Riçards, Rim, Robinson (Arfesten, 90+2), Adams (Pepi, 72), Makkenni, Tillman, Dest (Reyna, 46), Baloqan (Rayt, 90+2), Pulişiç (Berhalter, 59).
Belçika: Kurtua, Kastan, Nqoy, Mexele, Se Keyper, Raskin (Vitsel, 89), Onana (Vanaken, 21), Lukebakio (Doku, 67), Tilemans, Trossar (Salemakers, 89), De Ketelare (Lukaku, 67).
Qollar: Tillman, 31 – De Ketelare, 9; 33. Vanaken, 57. Lukaku, 90+3.
Sarı vərəqələr: Makkenni, 35. Tillman, 69.