DÇ-2026-nın İsveçrə – Qətər qarşılaşmasında yaşanan VAR (Video Köməkçi Hakim) qalmaqaldan sonra FİFA rəsmi bəyanatla çıxış edib. Matçın gedişatına və nəticəsinə birbaşa təsir edən texniki nasazlıq futbol ictimaiyyətində böyük rezonans doğurub.
1:1 hesabı ilə yekunlaşan qarşılaşmanın 14-cü dəqiqəsində İsveçrə millisinin xeyrinə penalti qərarı verilib. Lakin bu qərardan öncə isveçrəli futbolçunun ofsaydda olması şübhəsi oyunda gərginliyi pik həddə çatdırıb. Canlı yayım zamanı tamaşaçılara və media mənsublarına epizodun təkrarı, eləcə də virtual ofsayd xətlərinin qrafik təhlili təqdim olunmayıb. FİFA, penalti zərbəsindən öncə VAR sistemində ciddi texniki problemin yarandığını və bu səbəbdən qrafikanın ekrana ötürülə bilmədiyini təsdiqləyib.
Yaşanan xaos və narazılıqlardan sonra FİFA bəyanat yayaraq qəbul edilən hakim qərarının doğru olduğunu müdafiə edib: “Ekranda vizual görüntünün itməsinə səbəb olan texniki nasazlığa rəğmən, VAR sisteminin daxili analizində tətbiq olunan xətlər İsveçrə millisinin futbolçusunun penalti epizodundan əvvəl ofsaydda olmadığını dəqiq şəkildə qeydə alıb. Verilən qərar qaydalara tamamilə uyğundur”.