ABŞ və İran arasındakı gərgin diplomatik münasibətlər futbol dünyasından da təsirsiz ötüşməyib. Mundialda mübarizə aparacaq İran yığması qarşısında görünməmiş şərt qoyulub.

İranın Meksikadakı səfiri Abolfazl Pasandidehin Daily Mail nəşrinə açıqlamasına görə, yığmanın ABŞ ərazisində ardıcıl olaraq 24 saatdan artıq qalmasına icazə verilmir: “Biz ABŞ-yə yalnız matç günü səhər saatlarında daxil ola bilərik, lakin oyun başa çatan kimi, elə həmin gün də ölkəni tərk etməyə məcburuq”.

İran qrup mərhələsinin hər üç oyununu ABŞ-də – Los-Anceles və Sietl şəhərlərində keçirməlidir. İlkin plana əsasən, komandanın mundialdakı əsas düşərgəsi Arizona ştatında yerləşməli idi. Lakin mövcud qadağaya görə, İran millisi Meksikada məskunlaşacaq və oyunlara oradan uçacaq.

Bu qərar FİFA-nın mövcud reqlamenti ilə ciddi ziddiyyət təşkil edir. Qurumun qaydalarına görə, hər bir komandanın baş məşqçisi və kapitanı oyundan bir gün əvvəl qarşılaşmanın keçiriləcəyi stadionda mətbuat konfransı təşkil etməlidir. İran millisinə yalnız oyun günü səhər saatlarında ölkəyə giriş icazəsi verildiyi üçün bu qaydanın necə yerinə yetiriləcəyi hələlik qeyri-müəyyəndir.