Premyer Liqanın 32-ci turunda evdə “Qəbələ”yə 1:2 hesabı ilə məğlub olan “Karvan-Yevlax”ın baş məşqçisi Füzuli Məmmədov oyunsonrası mətbuat konfransında fikirlərini bölüşüb.

Təcrübəli mütəxəssis elitada qalmaq şanslarını itirən futbolçuları oyuna kökləməyin çətinliyindən danışıb və klubdakı gələcək taleyinə aydınlıq gətirib:  “Premyer Liqada qalmaq şansını tamamilə itirən bir komandanı motivasiya etmək olduqca çətindir. Futbolçularımı başa düşürəm. Buna baxmayaraq, onlar bu matça hazır olmaq üçün əllərindən gələni etdilər. Azarkeşlərimiz önündə qələbə qazanmaq istəyirdik və bunun üçün şanslarımız da var idi. Hesabda önə keçsək də, sadə bir səhv ucbatından qapımızda qol gördük. Bu məğlubiyyət bizi çox məyus etdi. Amma neyləmək olar, həyat davam edir”.

Klubdakı gələcəyi barədə danışan Füzuli Məmmədov, rəhbərliklə mövsümün sonunda masaya oturacağını bildirib: “Klubdakı gələcəyimlə bağlı məsələyə mövsümün sonunda aydınlıq gələcək. Rəhbərliklə danışacağıq. Əgər qarşıya yenidən Premyer Liqaya qayıtmaq tapşırığı qoyulsa, komandada qala bilərəm. Belə bir hədəf olmasa, təbii ki, digər təklifləri dəyərləndirmək məcburiyyətində qalacağam”.