Gəncənin “Kəpəz” klubunun müdafiəçisi Rauf Hüseynli Premyer Liqanın 30-cu turunda “Sumqayıt”la keçirilən qarşılaşmada (2:1) dubl edərək mövsümün statistik göstəricilərində yeniliyə imza atıb.

PFL-in rəsmi məlumatına görə, Rauf Hüseynli cari mövsümdə 3 dəqiqə ərzində iki qol vuran ikinci futbolçu olub. Matçın 86 və 89-cu dəqiqələrində rəqib qapısına yol tapan müdafiəçi, bu göstərici ilə “Qarabağ”ın vingeri Leandro Andradeyə çatıb. Xatırladaq ki, Andrade martın 8-də “Araz-Naxçıvan”la görüşdə (33 və 36-cı dəqiqələr) analoji uğura imza atmışdı. Lakin Andradenin qollarından fərqli olaraq, Rauf hər iki topu penalti nöqtəsindən tora göndərib.

Bundan başqa, Rauf Hüseynli cari mövsümdə bir qarşılaşmada iki penaltini qola çevirən 4-cü futbolçu olub. Ona qədər isə cari mövsümdə analoji uğuru Aleksandr Ramalinqom (“Sumqayıt”), Coy-Lans Mikkels (“Sabah”) və Toral Bayramov (“Qarabağ”) reallaşdırmışdılar.