UEFA Konfrans Liqasının pley-off mərhələsinin cavab oyununda “Qarabağ” inanılmaz dram yaşayıb. Səfərdə “Tvente” üzərində 1:0 hesablı qələbə qazanan Ağdam təmsilçisi Bakıda da uzun müddət mərhələni keçməyə çox yaxın olub. Lakin qarşılaşmanın son dəqiqələrində başlayan geridönüş əlavə vaxtda komandamız üçün ağır sonluqla nəticələnib. “Qarabağ” əlavə vaxtda rəqibinə 1:4 hesabı ilə məğlub olaraq iki oyunun yekununda üstünlüyü əldən verib və Konfrans Liqasında mübarizəni dayandırıb.
Düz 12 il əvvəl – 2014-cü ilin avqustunda “Qarabağ” məhz “Tvente” səddini aşaraq klub tarixində ilk dəfə avrokubokların qrup mərhələsinə – Avropa Liqasına vəsiqə qazanmışdı. Həmin vaxtdan etibarən Ağdam klubu 12 mövsüm ardıcıl olaraq Çempionlar Liqası, Avropa Liqası və Konfrans Liqasının əsas mərhələlərində mübarizə aparıb. Qəribə təsadüfdür ki, “köhlən atlar”ı 2013-cü ildən sonra ilk dəfə avrokubokların əsas mərhələsindən kənarda saxlayan komanda da məhz “Tvente” oldu.
Güclü külək və matçdan əvvəl başlayan şimşəkli leysan səbəbindən qarşılaşma bir neçə dəqiqə gecikmə ilə başlayıb. İlk hissədə tərəflər ehtiyatlı oyuna üstünlük veriblər. Fasilədən sonra isə “Qarabağ” hesabı açaraq üstünlüyü ələ alıb. 59-cu dəqiqədə Musa Qurbanlının ötürməsini cərimə meydançasında qəbul edən Kadi rəqib qapıçını soyuqqanlılıqla aldadaraq topu tora göndərib – 1:0.
Geridə olan “Tvente” son 15 dəqiqədə bütün gücü ilə hücuma atılıb. 79-cu dəqiqədə Vaut Veqhorstun başla endirdiyi ötürməni Marko Pyaça dəqiq zərbə ilə tamamlayaraq hesabı bərabərləşdirib. Əsas vaxta əlavə olunmuş 2-ci dəqiqədə isə künc zərbəsindən sonra Maks Brüns yaxın məsafədən fərqlənərək “Tvente”yə iki oyunun nəticəsinə görə hesabı bərabərləşdirməyə imkan verib – 2:2. Bununla da qarşılaşmanın taleyi əlavə vaxta daşınıb.
Əlavə vaxtda isə “Qarabağ” fiziki baxımdan tükənməyin acısını yaşayıb. Ağdam təmsilçisi rəqibin ardıcıl hücumları qarşısında müqavimət göstərməkdə çətinlik çəkib. 94-cü dəqiqədə cərimə meydançasındakı qarışıqlıqdan istifadə edən Vaut Veqhorst “Tvente”ni hesabda önə keçirib – 1:3.
“Qarabağ”ın vəziyyəti 106-cı dəqiqədə daha da ağırlaşıb. Marko Yankoviç Veqhorstla yaşadığı insidentdən sonra ikinci sarı vərəqə ilə cəzalandırılaraq meydandan qovulub. Azlıqda qalan Ağdam təmsilçisinin müqaviməti isə 115-ci dəqiqədə tamamilə qırılıb. Qapıçı Martin Zlomisliçin cərimə meydançasında etdiyi kobud səhvdən yararlanan Yunes Taha topu boş qapıya göndərərək matçın yekun hesabını müəyyənləşdirib – 1:4.
Beləliklə, “Qarabağ” 12 il əvvəl başladığı “Tvente” hekayəsinin ikinci hissəsində acı sonluqla üzləşib. İlk oyundakı 1:0 hesablı qələbəyə baxmayaraq, Bakıda əlavə vaxtda buraxılan üç qol Ağdam təmsilçisini Avropa səhnəsinin əsas mərhələsindən kənarda qoyub.
UEFA Konfrans Liqası. Pley-Off mərhələsi, cavab oyunu
«Qarabağ» (Azərbaycan) – «Tvente» (Niderland) 1:4
(ilk oyun – 1:0)
Qollar: Kadi 59 – Pyaça 79, Brüns 90+2, Veqhorst 94, Taha 115
Hakim: Rohit Saqqi (Norveç)
«Qarabağ»: Martin Zlomisliç, Bence Varkonyi, Bədavi Hüseynov (Bəhlul Mustafazadə, 114), Bruno Lanqa (Dani Bolt, 70), Mateus Silva, Samuel Lobatu (Pedro Bikalyo, 70), Marko Yankoviç, Kadi (Coni Montyel, 86), Cali Muaddib (Hikmət Cəbrayılzadə, 114), Oleksiy Kaşşuk, Musa Qurbanlı (Çebrail Makretskis, 70)
«Tvente»: Lars Unnerştall, Ruud Neystad (Aske Adelqor, 90+5), Robin Prepper (k) (Lukas Veneqor of Hesselink, 70), Bart van Roy, Maks Brüns, Ramiz Zerruki, Dauda Veydmann (Matias Kyele, 97), Yunes Taha, Daan Rots (Tomas van den Belt, 91), Sonner Eryaseter (Marko Pyaça, 70), Vaut Veqhorst (Filip Torvaldsen, 109)
Sarı vərəqələr: Zerruki, Lanqa, Lobatu, Yankoviç, Varkonyi, Muaddib, Veqhorst, Taha
Qırmızı vərəqə: Yankoviç, 106 (ikinci sarı vərəqə)
Tofiq Bəhrəmov adına Respublika Stadionu