Türkiyənin “Bursaspor” klubunda çıxış edən millinin futbolçusu Toral Bayramov ölrə mediasına açıqlamasında Nəriman Axundzadənin “Ərzurumspor”a transferi ilə bağlı fikirlərini bölüşüb.
O, gənc hücumçunun potensialına inandığını bildirib: “Nəriman ölkəmizin ən istedadlı gənc oyunçularından biridir. Ancaq indidən onun “Ərzurumspor”da neçə qol vuracağını demək düzgün olmaz. Hər bir futbolçunun arzusu qol vurmaqdır. İnanıram ki, o da komandasına fayda vermək üçün əlindən gələni edəcək”.
Bayramov, həmçinin, Axundzadənin Türkiyə klubundan təklif aldıqdan sonra onunla məsləhətləşdiyini də açıqlayıb: “Burada olduğum müddətdə qazandığım təcrübəni onunla bölüşdüm, müəyyən məsləhətlər verdim. Ərzurumla Bursa arasında məsafə uzaq olsa da, mütləq görüşəcəyik”.
Nəriman Axundzadə ABŞ-ın “Kolambus Kryu” klubundan “Ərzurumspor”a bir illik icarə əsasında keçib.