“Zirə”nin baş məşqçisi Rəşad Sadıqov ölkə kubokunun final matçı öncəsi Peşəkar Futbol Liqasının (PFL) mətbuat xidmətinə geniş müsahibə verib. Təcrübəli mütəxəssis həlledici qarşılaşmaya hazırlıq prosesi və rəqib barədə fikirlərini bölüşüb.

Komandasının hazırlıq planlarından danışan Sadıqov, rəqibin cari mövsümdəki performansını yüksək qiymətləndirib: “Oyuna maksimum səviyyədə hazırlaşmağa çalışırıq. Rəqibimiz artıq Misli Premyer Liqasında çempionluğu rəsmiləşdirib və təbii ki, hazırda komandada yüksək əhval-ruhiyyə hökm sürür. Onlar mövsüm boyu nümayiş etdirdikləri möhtəşəm və sabit oyunla bunu sübut etdilər. Finalda hansı gücdə olan rəqiblə qarşılaşacağımızı yaxşı dərk edirik. Buna baxmayaraq, meydanda bütün gücümüzü qoyacağıq ki, finalın sonunda sevinən tərəf biz olaq”.

Rəşad Sadıqov “Zirə”nin kubok finallarındakı keçmiş təcrübəsinə də toxunub. O, komandasının sayca üçüncü finalına çıxacağını xatırladaraq, bu dəfə titul qazanmaq niyyətində olduqlarını vurğulayıb: “Bu, klubumuzun ölkə kubokunda üçüncü finalı olacaq. Əvvəlki iki həlledici matçda, təəssüf ki, məğlubiyyətlə üzləşmişik. Həmin oyunların birində penaltilər seriyasında, digərində isə əsas vaxtda uduzduq. Hər iki qarşılaşmada sona qədər mübarizə aparmışdıq və azarkeşlərin yaddaşında qalan finallar olmuşdu. Lakin əsas məqsədimizə — kuboka sahib çıxa bilməmişdik”.

Baş məşqçi budəfəki rəqib olan “Sabah”ın kubokdakı təcrübəsinə də diqqət çəkib: “Finaldakı rəqibimiz “Sabah” ötən mövsüm ölkə kubokunun qalibi olub. Onlar necə əzmkar mübarizə aparmağı və qələbə qazanmağı bacardıqlarını artıq göstəriblər. Bizi çox gərgin və maraqlı bir qarşılaşmanın gözlədiyindən əminik”.