Avropa Liqasının 1-ci təsnifat mərhələsinin ilk oyununda təmsilçimiz «Qarabağ» öz meydanında İslandiyanın «Vestri» klubunu qəbul edib. Tofiq Bəhramov adına Respublika Stadionunda keçirilən qarşılaşma Ağdam klubunun 3:0 hesablı qələbəsi ilə yekunlaşıb.
Ötən mövsüm Premyer Liqada «Sabah»ın ardınca ikinci pillədə başa vuran və ölkə kuboku ilə erkən vidalaşan Qurban Qurbanovun yetirmələri yeni avrokubok mövsümünə iddialı start verdi. Rəqib isə İslandiya ikinci divizionunda çıxış etməsinə baxmayaraq, ölkə kubokunun qalibi kimi qitə miqyaslı turnirə vəsiqə qazanan və təəccübləndirməyi bacaran «Vestri» idi.
Matçın ilk dəqiqələrindən etibarən topa nəzarəti ələ keçirən «Qarabağ» rəqib qapısı qarşısında davamlı təzyiq edirdi.
İslandların müdafiə xətti yalnız ilk yarım saat ərzində təzyiqə tab gətirə bildi. 30-cu dəqiqədə Aleksey Kaşçukun sağ cinahdan cərimə meydançasına etdiyi kəskin asma rəqib müdafiəsini yardı və mövqe seçməyi bacaran Zakariya Savo baxımlı baş zərbəsi ilə hesabı açdı — 1:0.
Qoldan sonra da hücumlarını səngitməyən təmsilçimiz fasilə ərəfəsində üstünlüyünü ikiyə çatdırıdı. 45+2-ci dəqiqədə Abdulla Zubir rəqib müdafiəçi Qardarssonun kobud səhvindən yararlanaraq topu ələ keçirib və qapıçı ilə təkbətək mübarizədən qalib ayrılıb – 2:0.
Fasilədən sonra tabloya yansıyan üstünlüyün yaratdığı rahatlıqla oyuna tam nəzarət edən Ağdam təmsilçisi, islandların seyrək əks-hücum cəhdlərinin qarşısını inamla kəsərək qapısı önündə heç bir təhlükə yaranmasına imkan verməyib. Matçın sonlarına yaxın isə Ağdam klubu baxımlı kombinasiya ilə yekun nöqtəni qoydu. 86-cı dəqiqədə sürətli hücum zamanı Z. Savo topu cərimə meydançasına qədər daşıyaraq əlverişli mövqedə olan Renaldo Sefasa ötürdü. Sonuncu isə fürsəti qaçırmayaraq matçın yekun hesabını müəyyənləşdirib – 3:0.
Komandalar arasındakı cavab qarşılaşması iyulun 16-da İslandiyanın paytaxtı Reykyavikdə baş tutacaq. «Qarabağ» bu inamlı qələbə sayəsində 2-ci təsnifat mərhələsinə vəsiqəni böyük ölçüdə təmin edib.
UEFA Avropa Liqası, 1-ci təsnifat mərhələsi, ilk oyun
«Qarabağ» (Azərbaycan) – «Vestri» (İslandiya) 3:0
Qollar: Z. Savo (30), A. Zubir (45+2), R. Sefas (86)
«Qarabağ»: Mateuş Koxalski, Bertse Varkonyi, Bədavi Hüseynov (Dani Bolt, 88), Mateus Silva, Bruno Lanqa (Elvin Cəfərquliyev, 65), Pedro Bikalyo, Marko Yankoviç (Samuel Lobato, 65), Kadi, Aleksey Kaşçuk (Cali Muaddib, 65), Abdulla Zubir (Renaldo Sefas, 79), Zakariya Savo.
«Vestri»: Marvin-Darri Steynarsson, Konstantin Çeşmedjiev, Edson, Elmar Qardarsson, Qudmundur Svavarsson (Q. Eynarsson, 57), Tibanq Kafu Fete, Qunnar Hauksson (B. Eydal, 77), Serjin Fall, Tordyur-Qyunnar Haftorsson (A. Merfelt, 57), İbrahima Balde (Y. Stensson, 26), Breki Hermannsson (Y. Selven, 77).
Baş hakim: Roman Jitar (Moldova)
Sarı vərəqə: Fall (2) Bakı, Tofiq Bəhramov adına Respublika Stadionu