UEFA Konfrans Liqasının II təsnifat mərhələsinin cavab matçında “Neftçi” səfərdə (neytral meydanda) Belarusun “Dinamo” (Minsk) komandası ilə qarşılaşıb. İlk matçdakı məğlubiyyətin əvəzini çıxmağa çalışan flaqman minimal hesablı qələbə qazanıb, lakin bu nəticə mərhələ adlamaq üçün kifayət etməyib.
Bakıdakı uğursuz oyundan sonra baş məşqçi Yuriy Vernıdub heyətdə ciddi dəyişikliklərə əl atdı. Birinci matçda zəif təsir bağışlayan Mustafa Sek, İqor Ribeyro və Sessi D’Almeyda ehtiyatda saxlanıldı. Bu dəyişikliklər oyunun startında özünü doğrultdur. 12-ci dəqiqədə Breno Almeyda cərimə meydançası önündən baxımlı və dəqiq zərbə ilə hesabı açdı.
Qoldan sonra da “ağ-qaralar” meydanda daha fəal tərəf idi. Lakin topa nəzarət etmələrinə baxmayaraq, bakılılar rəqib qapısı qarşısında kəsərli qol epizodları yaratmaqda çətinlik çəkirdilər. Kapitan Emin Mahmudovun standart vəziyyətlərdən etdiyi ötürmələr də daxil olmaqla, hücumların yekunlaşdırılmasında dəqiqlik çatışmırdı.
Fasilədən sonra Vernıdub hücum xəttini canlandırmaq üçün Bassala Sambunu meydana buraxdı. Matçın sonlarına doğru təzyiqi artıran “Neftçi” ümumi hesabı bərabərləşdirməyə çox yaxın oldu. 77-ci dəqiqədə Breno Almeydanın təhlükəli cərimə zərbəsini Minsk klubunun qapıçısı çətinliklə dəf etdi. Matçın əlavə olunmuş 90+4-cü dəqiqəsində isə Falaye Sako birbaşa qırmızı kart alaraq komandasını azlıqda qoydu.
Minimal hesablı qələbəyə (1:0) baxmayaraq, iki oyunun nəticəsinə əsasən 3:4 hesabı ilə geridə qalan “Neftçi” UEFA Konfrans Liqasındakı mübarizəsini dayandırdı. “Dinamo” isə III təsnifat mərhələsinə vəsiqə qazandı.
UEFA Konfrans Liqası, II təsnifat mərhələsi, cavab oyunu
“Dinamo” (Minsk, Belarus) – “Neftçi” (Bakı, Azərbaycan) 0:1
İlk oyun – 4:2
29 iyul. Stara Zaqora (Bolqarıstan), “Beroe” stadionu
Baş hakim: Tim Marşall (Şimali İrlandiya)
“Dinamo”: Şimakoviç, Qurban (Şvetsov, 83), İvanov, Kalinin, Ture, Selyava (Jeçko, 67), Sokolovski, Abdullahi, Djime (Alıkulov, 83), Vardanyan (Qvet, 67), Malaşeviç (Bequnov, 90+1)
“Neftçi”: Balayev, Sako, Qraviyon, Xaçayev, Abbasov, Klisman, Metyu (D’Almeyda, 74), Mahmudov (Ribeyro, 86), Breno Almeyda (Səfərov, 74), Tupta (Sambu, 58), Fərəc
Qol: Breno Almeyda, 12.
Sarı vərəqələr: Sokolovski, 24; Qraviyon, 30; Qvet, 88
Qırmızı vərəqə: Sako, 90+4