Sloveniyada təlim-məşq toplanışını davam etdirən “Neftçi” növbəti yoxlama oyununa çıxıb. Yuri Vernidubun yetirmələri Serbiyanın “Radniçki” (Niş) klubu ilə qarşılaşıb.
Matç “ağ-qaralar”ın tam üstünlüyü ilə keçib və paytaxt təmsilçisinin 3:0 hesablı darmadağınla başa çatıb.
Görüşə sürətli başlayan “Neftçi” artıq 2-ci dəqiqədə Almeydanın qolu ilə hesabı açıb. 26-cı dəqiqədə dublunu rəsmiləşdirən hücumçu komandasının üstünlüyünü artırıb. Matçda son nöqtəni isə 82-ci dəqiqədə Ağadadaş Salyanski qoyub.
Xatırladaq ki, bakılılar Sloveniya toplanışı çərçivəsində keçirdikləri əvvəlki oyunlarda Rumıniyanın “ÇFR Kluj” (1:2) və Serbiyanın “Partizan” (0:1) klublarına məğlub olmuşdular.
“Neftçi” hazırlıq prosesindəki növbəti və sonuncu sınaq matçını iyulun 13-də Xorvatiyanın “Osiyek” klubuna qarşı keçirəcək.