Avstriyada təlim-məşq toplanışını davam etdirən millimizin düşərgəsində ciddi gərginlik yaşanır.

AFFA-nın rəsmi açıqlamasına görə, baş məşqçi Ayxan Abbasov Anton Krivotsyuk və Abdulla Xaybulayevi heyətindən kənarlaşdırıb. Bu radikal addıma Maltaya qarşı keçirilən yoldaşlıq oyununda (0:2) buraxılan ikinci qoldan dərhal sonra komanda yoldaşları arasında baş verən insident səbəb olub.

Yığmanın digər bəd xəbəri isə zədə düşərgəsindən gəlib. Malta ilə matçın 9-cu dəqiqəsində məcburi əvəzlənən “Sabah”ın vingeri Xəyal Əliyevin zədəsinin gözlənildiyindən daha ciddi olduğu müəyyənləşib. İlkin proqnozlara görə, əzələ yırtığı şübhəsi olan gənc futbolçu yaxın günlərdə MRT müayinəsindən keçəcək. Onun sıraya dönməsinin ən azı iki ay çəkəcəyi gözlənilir. Beləliklə, X.Əliyev San-Marino ilə keçiriləcək növbəti yoldaşlıq görüşündə komandasına kömək edə bilməyəcək.