DÇ-2026-nın yarımfinalında İngiltərəni 2:1 hesabı ilə məğlub edərək finala yüksələn Argentina yığmasının oyundan sonrakı hərəkəti böyük siyasi qalmaqala səbəb olub. Meydanda “Las Malvinas son Argentinas” (Folklend adaları Argentinanındır) yazılmış pankart açan futbolçular Böyük Britaniyanın sərt reaksiyası ilə üzləşiblər.
Matçdan sonra qələbəni qeyd edən komandanın kapitanı Lionel Messi, eləcə də Kristian Romero və Lisandro Martinez kimi oyunçuların açdığı pankart ciddi müzakirələrə yol açıb. Yarımmüdafiəçi Leandro Paredesin “Folklend həmişə Argentinanın olacaq” açıqlaması isə gərginliyi daha da artırıb.
FİFA-nın tədbirlərində siyasi mesajların qəti qadağan olunmasına baxmayaraq baş verən bu insident Böyük Britaniya hökumətini hərəkətə keçirib. Baş Nazirin ofisi FİFA-dan dərhal intizam araşdırması başlamağı tələb edərək, rəsmi bəyanatda bu diqqətçəkən ifadəyə yer verib: “Dünya Kuboku bizim olmaya bilər, lakin Folklend adaları mütləq bizimdir”.
Britaniyanın siyasi dairələri baş verənlərə sərt reaksiya verərək, FİFA-dan dərhal addım atmağı tələb ediblər. Liberal Demokratların lideri Ed Deyvi 2024-cü ildə “Cəbəllütariq İspaniyanındır” şüarına görə Rodri və Alvaro Moratanın cəzalandırılmasını presedent kimi göstərərək, həmin pankartı tutan argentinalı futbolçuların final oyunundan kənarlaşdırılmasını tələb edib. Eyni zamanda, Mühafizəkarlar Partiyasının lideri Kemi Badenok Folklend adalarının Britaniya ərazisi olduğunu bəyan edərək, bu torpaqların hər zaman müdafiə olunacağını vurğulayıb.
Bu, FİFA üçün ilk belə hal deyil. 2014-cü ildə Sloveniya ilə yoldaşlıq oyunundan əvvəl eyni məzmunlu pankart açdığı üçün Argentina yığması 20 min funt-sterlinq cərimələnmişdi. Turnir ərzində hər cür siyasi şüar və bayraqlar qadağan olunduğundan, Argentinanın yenidən cəza alacağı gözlənilir.
Argentinanın vitse-prezidenti Viktoriya Vilyarruel də futbolçulara dəstək verərək, İngiltərəni “torpaq qəsbkarı olan quldurlar” adlandırıb. O, “Pankartları qadağan edə bilərlər, amma bunu qanımızdan silə bilməzlər” deyərək gərginliyi artırıb.
Futbol meydanındakı bu gərginlik diplomatik müstəviyə də sıçrayıb. Argentina hökuməti Britaniyanın “HMS Medway” hərbi gəmisinin onların ərazi sularına qanunsuz daxil olduğunu iddia edərək rəsmi etiraz notası verib. Böyük Britaniya isə hərəkət barədə Buenos-Ayresin əvvəlcədən məlumatlandırıldığını bildirərək ittihamları rədd edib.
Məlumat üçün: Folklend (Malvin) adaları uğrunda 1982-ci ildə iki ölkə arasında baş vermiş 10 həftəlik müharibə Böyük Britaniyanın qələbəsi ilə başa çatıb. Həmin münaqişədə hər iki tərəfdən ümumilikdə 900-dən çox hərbçi həlak olub.