Bolqarıstanın ÇSKA klubunun müdafiəçisi Teodor İvanov Avropa Liqasının II təsnifat mərhələsində “Qarabağ”a qarşı keçirəcəkləri ilk oyun öncəsi fikirlərini bölüşüb.

Vasil Levski adına hava limanında Bakıya yola düşməzdən əvvəl “Topsport.bg” portalına açıqlama verən futbolçu rəqibin gücünə diqqət çəkib: “Komandamızın oyuna tam hazır olduğunu düşünürəm. “Qarabağ” kifayət qədər yüksək səviyyəli raqibdir. Bakıda yaxşı nəticə qazanmaq üçün əlimizdən gələni edəcəyik”.

İvanov ölkə çempionatının startında “Slaviya” ilə bərabərə qaldıqları oyuna da toxunaraq, öz potensiallarını göstərə bilmədiklərini etiraf edib: “Həmin matçda lazımi əzm və həvəsi göstərə bilmədik, real potensialımızı nümayiş etdirmədik. ÇSKA üçün heç-heçə məğlubiyyətə bərabərdir. İndi ən vacibi keyfiyyətli futbolla qələbə qazanıb komandadakı əhval-ruhiyyəni yüksəltməkdir”.

Gənc müdafiəçi komanda ətrafındakı təzyiqdən və Bakıdakı matçda azarkeş dəstəyinin olmamasından da söz açıb: “Təzyiq həmişə var. Əgər təzyiq hiss olunursa, deməli, nəyisə yaxşı edirsən. Azarkeşlərimiz uğurlarımızın 50 faizini təşkil edir. Bakıda yanımızda ola bilməyəcəklər və əlbəttə, onların yoxluğunu hiss edəcəyik. Lakin onları televiziya qarşısında sevindirmək üçün meydanda sonadək mübarizə aparacağıq”.