Ötən gecə Avropa futbolunda həm fərdi rekordların təkrarlanması, həm də komandaların tarixi uğurları ilə yadda qaldı.

Kilian Mbappé: Tarixi rekordun təkrarı

“Real”in ulduzu Kilian Mbappe “Monako” ilə matçda dubl edərək adını tarixə yazdı. Fransız hücumçu ümumi mərhələnin 7 turunda vurduğu qolların sayını 11-ə çatdıraraq, Kriştianu Ronaldonun 2015/16 mövsümündə müəyyən etdiyi “bir qrup/ümumi mərhələdə ən çox qol” rekordunu təkrarladı. Maraqlıdır ki, Ronaldo bu nəticəni 6 oyuna imza atmışdısa, Mbappé də eyni məhsuldarlığı göstərib (Kilian 6-cı turda “Mançester Siti” ilə qarşılaşmanı buraxdığı üçün 11 qolu məhz 6 matçda vurub).

“Arsenal”ın “Qızıl dövrü”

Səfərdə “İnter” üzərində 3:1 hesablı inamlı qələbə qazanan “Arsenal” hazırda “qızıl dövrünü” yaşayır. “Topçular” tarixində ilk dəfə Çempionlar Liqasında ardıcıl 7-ci qələbəsini qazanıb. İngilis klubları arasında yalnız “Mançester Siti” daha uzun seriyaya (10 qələbə) malikdir. Bu qələbə ilə Mikel Artetanın yetirmələri 1/8 final mərhələsinə vəsiqəni rəsmən təmin ediblər. Londonlular növbəti turda evdə “Kayrat”ı qəbul edəcək.

“İnter”də eniş davam edir

Kristian Kivunun rəhbərlik etdiyi “İnter”də isə işlər yolunda getmir. Milanlılar son üç matçda xal qazana bilməyiblər (“Atletiko” 1:2, “Liverpul” 0:1 və “Arsenal” 1:3). 7 turdan sonra aktivində 12 xal olan komanda, ilk “8-liy”i tərk edərək 9-cu sıraya geriləyib. Yanvarın 28-də Dortmund “Borussiya”sı ilə keçiriləcək oyun milanlıların turnir cədvəlindəki taleyini müəyyənləşdirəcək.